ITV del güeyu malu. De guah.e mandáronme tapar el bonu porque siendo'l malu un güeyu vagu igual asina trabayaba un poco más. Como nun me pegaron un par d'hosties destapélu y güei'l malu ta d'adornu. Si ta d'adornu, pa qué vas a la ITV? Porque l'adornu entamó a ver (ye un dicir) los relós como los pintaba Dalí y nun vaiga ser que'l surrealismu termine pasando al bonu, que ye col que percibo'l mundiu. Y paro d'escribir porque les gotes tán yá faciendo efeutu.

FOGUERA SAN XUAN (1)

N'aquella dómina'l barriu yera arrabalde ensin asfaltar porque'l progresu entá nun metiere los focicos nél. Güei ye barriu de tráficu rodáu a esgaya, centru comercial, tolos supermercaos del capitalismu internacional menos ECI y más sidreríes, restoranes y cafeteríes que les que pue haber, nun sé, en tola comunidá d'Estremadura. Ser guah.e nesti barriu mordíu na yugular pol progresu del putu PERI tien de ser una mierda smartphones camín del acosu o l'espardimientu imaxes smartpholóxicos nel institutu.

Ún ye un home costumes, y más mediada la cincuentena. Cuando entres nuna selmana erma de rutina, inventes el primer día y, si te presta, cálqueslu. Yá la ties: pela mañana la perra mexa y caga y, con ella arrequexada tremando fasta que se-y pasa, tas yá nel momentu'l café col periódicu. Xintes llueu arroz con atún con un fondu fritada tomate y el vinu que sobró de la nueche anterior. Écheste en cama a facer la dixestión y esfacer el mediu enfile lleendo "L'últimu volador", de Milio, pa entamar la tarde con otru café con lleche (agora mesmo fináu) pa garrar la Vespa y facer parroquies pa esfacer lo que queda hasta la cena.

Entamamos bien la tarde: irregularidá llonxitudinal (sabío ye que ye'l mayor enemigu les ruedes d'una Vespa) made in Moriyón nel firme la Carretera la Villa, xunto al Colexu l'Asunción; bambolió la moto, nun tris de zarapicar.

PENSIONES PAL BABY BOOM

N'España en 1964 ñació'l mayor númberu neños de tola so hestoria. La Cadarma ye baby boom en sentíu estrictu. Como nun mos maten enantes, dientro nada España va morrer de risa coles pensiones. Lo que la lletricidá fixo nos sesenta nun pue facelo agora la electrónica, seique por escesu lletricidá.

APAICIÓN D'ANTALTECH

Antaltech pena ente dos mundos. P'Antaltech el llargu pasiellu de lluz blanco que lleva a la Sala'l Fierro ye como l'andén nel que'l Ferroviariu por orde de Merovinxu tentó de retener a Neo. L'amor, ai, de Tríniti lliberó del circuitu zarráu a Neo. Dengún amor va lliberar a Antaltech, que nun tien quien lu quiera. Ayeri de tarde Semicrític y la Cadarma fomos testigos de la más qu'improbable (yá ven) manifestación en Mátrix d'Antaltech, del que nin el mesmu Párkinson, ferroviariu del merovinxu de la mátrix de Xixón, tien noticia. Debaláu, hores de más na Sala'l Fierro, miró ensin facer por velu, como quien nin se molesta en sescudise d'enriba l'áscuara'l pitu, a Párkinson cuando-y alvirtió que taba pasándose del tiempu abonáu: si tu supieres, nin; tu que nun yes más que una probe pila qu'alimenta a les máquines porque pensándolo meyor el mesmu Párkinson nin ye mesmu nin ferroviariu de Merovinxu nin de naide nin siquiera funcionariu'l conceyu Xixón. Probe Párkinson, qué sabrá él d'Antaltech.

VACACIONES PER ASTURIES (2.2). PERLORA

Los domingos de va milenta años pá garraba'l 600 D y cola tartera con tortiella y carne empanao, el balón y la mesa y les sielles plegables tirábemos pa Perlora. A la solombra'l xalé más afayadizu pasaben el día los vieyos mientres Semicritic y la Cadarma, esploradores, llegaben al Campu de Marte o, necios, nun paraben d'aburrir a pá fasta que nun se ponía a xugar a fútbol con ellos o-yos compraba a cambéu un xeláu.

VACACIONES

Pa Ca Colo, en Cecea, la cosa ta en xintar daqué relleno y el mediu filete con pataques con un Prau Rei qu'ayeri petóme Protos, quiciabes pensando na botella gran reserva reservada pa ocasión especial. Foi berenxena relleno carne en tires, el filete empanáu rellenu xamón y quesu, d'enantes qu'esistiere'l fenómenu'l cachopu, "escalope" primer cachopu asturianu, como quien diz. Bono. Agora vamos garrar la Vespa pa facer el Senén perhí esta tarde del día primeru de vacaciones. Don Semicritic ta trabayando por min nel Santu Oficiu con basura radioactivo.