La Che... del mio amor chachachá ye abrir La Nueva España y vela tarrecer l'asturianu, espantible pa ella, cuasi sangrín nun se sabe por qué: nun sabemos qué-y fixo a la Che... del mio amor chachachá l'asturianu. Probina. La Che... del mio amor chachachá quier pega-yos la so medrana a los demás falando de nun sé qué que-yos vamos facer los asturianufalantes a los castellanfalantes, polo menos chalos d'Asturies a fesoriazos: un reximientu d'académicos y escritores que los va escorrer fasta l'exiliu por nun falar asturianu, perpeligrosu bable pa ellos, los probinos del horru, les madreñes, los cachopos y la sidra. Ai mio ma; á Che... del mio amor chachachá.

Adolfo Camilo Díaz ye un coñón. Dos vegaes tuvi a puntu de chalu pa la basura pero aselecí porque daqué había. Nun me presta l'humor ensin aliendu, por muncho que l'autor quiera amosanos un mundu paralelu que nel ensinxacíu ye onde tien el xacíu. Daqué que yo nun sabía había perbaxo y alcontrélo a la fin pola mor del mio emburriu na escuridá tres les ceyes. Pagó la pena algamar el final. Psicokiller.

EL SPORTING ARTIFICIAL

Baraxa nun tien más remediu que ser la estensión de Torrecilla y enxamás va poder ser el quiciabes Xose Albertu: va siguir poniéndonos al delantreru más ermu que conozo na hestoria'l Sporting tando ehí Neftali Manzambi, que fai más nun minutu que l'ermu en noventa. Nun sé cómo a estes altures tovía hai xente que nun sabe o nun quier saber que'l Sporting artificial nun ye l'artificial Real Madrid, sacante -y nun quiero pensar mal- haya munches perres pel mediu pa dientro'l bolsín de caún.

DEL DERBI

Hai xente que pasó la nueche albentestate na redolada El Molinón pa poder mercar entraes pal Uviéu-Sporting. Sportinguistes a más non poder que nun atetuyen asina teamos en payares, asina tean como tán Uviéu y Sporting. La temporada pasada'l Sporting entamó a espoxigar dempués que l'Uviéu lu baltara n'Uviéu, onde'l gol de Yoni nun valió un res. Pero nun me paez que la xente de Sporting direutu, la que nun atetuya esmolecío de nueche perllargo y cutu qu'escarabaya'l pelleyu, caya na cuenta d'esos paralelismos. Cayer nella cayo yo, que voi ver el partíu, si lu veo, en casa o en chigre.

Tamos que damos pena; tamos pa sollutar, ensugar llárimes y siguir sollutando. El d'antayeri foi'l primer alcuentru d'esta temporada que vi enteru: tres d'una primer parte p'agospiase a pensión completa embaxo les mantes dientro la cama, bien metíos na segunda'l fútbol alloqueció de medrana con cuatro goles que nin por eses ye a ver el merucu atristayáu de los dos millones d'euros, que nin los güel. Los goles.

DOLFOS

Axuntámonos los xueves pela nueche pa beber una botella vinu, picar daqué y falar, falar muncho. Demientres nun falemos de política, too va dir bien. Esti xueves cambiamos de palu escoyendo una botella que mos llamara l’atención el xueves anterior: Dolfos. Vellido Dolfos y eses coses, yá saben. Cambiamos de palu vinu y de palu pallabres: nun se faló de política. A la Difunta dan-y perceguera sistemática Pedru Sánchez y Pablu Iglesies, y alloria toa. Diz que nun pue ver tampoco al Casáu nin al Rivera, pero lo de Pedru y Pablu ye la guerra: tarrezlos. Dolfos, quesos asturianos, croquetes. La de les telecomunicaciones, a mandrecha. A manzorga, la so fía. Enfrente de mio, la Difunta. Taba atristayada esti xueves la Difunta. ¿Qué te pasa, ne? A ti voi cuntátelo. Bocáu quesu. Croqueta. Dolfos. La Difunta dexa cayer anicios d’hestories que nun quier, nun me quier cuntar, nun vaya yo creyer que ensin mi ta desgraciada, nun ye a valese nesti mundu mierda. Dolfos. Croqueta. Bocáu quesu. ¿Ponemos pan? Home, claro: con pan, quesu y vinu fixo Sancho Panza’l camín. El camareru del coñu sur mírame como’l que mira a un marcianu, o a un babayu. Nun quiero averigualo. La de les telecomunicaciones ri. Ri les mios gracies, abondes con Dolfos, Dolfos y Dolfos. Risa y gracies. Sicasí, la Difunta pásalo bien. Nun creyan que ye a la bona Dios. Non. La Difunta tien su lleche malo, mui mala lleche. Por eso ye Difunta. Esti xueves falemos del pasáu, enllenu solombres, furacos d’escaecimientu y alcordances nidies. Y perbaxo la risa quedóme l’amargu saborguiar de la tristura de la d’enfrente.

VIRUS

“Virus, el: sust. Microorganismu parásitu [formáu d’un tipu solu d’ácidu nucleico qu’infesta les célules vives].”

Funcionariu’l Santu Oficiu, so persona personal de riesgu, asina que me dexé poner la vacuna la gripe, un añu más. Esti talamente paez que me la metió torcía un curciu: primero mancóme, llueu dolióme y agora toi atacáu virus. Miércoles moscosu. Úpome de la cama. Paracetamol pa esta gripe piquiñina, llaceria grande. Métome un café nel cuerpu, métome en garaxe, garro la Piaggio Vespa PX 150 y colo pa la biblioteca Xovellanos a devolver los llibros lleíos. Aparco la Vespa nun espaciu mínimu. Xubo’l caballete col tacu’l zapatu. Toi dientro. Felicidá d’entornu sele. Los virus ún acarrétalos meyor. No d’abaxo enfilé drechu, repito autor tres la llectura de “Democracia”, de Pablu Gutiérrez: coyonuda. Métola na mochila. Voi pa lo d’arriba. Ellí tán los llibros n’asturianu. Dellos estudiantes colos sos portátiles, coles sos tabletes. Párome tranquilu a güeyar: busco llibros de la editorial Ámbitu. Busco una novela curtia. Alcuéntrola pronto: “Mediaos del 69”. Nun tien mala pinta. Espaciu mínimu. Montáu nella arranco a pedal la Vespa. Saco perres. Voi con elles pa la Caxa Rural. Nun les quieren. Les comunidaes de vecinos fasta les diez y media. Oi, que nun ye un mes nin son dos, que ye tou l’añu, un sacu perres, y que me dixeron equí mesmo qu’eso podía pagalo cuando quixera. Les comunidaes de vecinos fasta les diez y media, y d’ehí nun saques a la caxera, el caxeru mirando pa otru llau. Y van ser dos euros de comisión. ¿Cómo ye, ho? ¿Dende cuándo? Dende marzu. Vamos ver: ¿traigo yo les perres en mano y por meteles equí son dos euros de comisión? Dos euros de comisión. Nin Dios en la oficina la Caxa Rural. El caxeru tocándose a dos manes los coyones, ella les tetes. Les comunidaes de vecinos fasta les diez y media y van ser dos euros de comisión. Nun los mando a tomar per culu non por falta ganes. Meto les perres nel mio bancu. Yá pagaré la puta comunidá otru día. Yá tuvi bastante. Y pa pagar dos euros, faigo tresferencia. Pido un Rioxa nel chigre’l vinu. Entamo “Mediaos del 69”. Xinto en casa con un poquiyín más de vinu. Paracetamol. Voi pa la cama. A pasar la tarde. Viendo películes. Reviéndoles. “A la revolución nun Dos Caballos”. Una fatada, como la primer vez que la vi. “Mozu pa siempres”, pastelada yanqui pero con Mel Gibson xeláu y revivíu, qu’asina presta. “El planeta los simios” de Tim Burton, película amenorgada por crítica y públicu porque la compararon cola de Charlton Heston y a posteriori cola saga moderna, Pierre Boulle aparte; tien, sicasí, al meyor chimpancé, el de Tim Roth, de tola hestoria del planeta esi. Y el penúltimu capítulu de “Cúntame cómo pasó”, col Carlinos definitivamente ababayáu.

Los dominios que presten son los matemáticos y los de casa. Los demás depende d'aú alcance la casa caún.

¡VIVA’L FOLCLOR!

Nun ye la primer vez nin va ser la cabera que veo averase a un paisanu au tán los periódicos, buscar El Comerciu, que ta yá en manes d’otru veceru, dexar de llau El País y garrar el Marca, porque l’orde simplayu vien ser esti: 1. El Comerciu, 2. La Nueva España, 3. As o Marca, 4. El Mundu, 5. El País. Dempués esi paisanu, bien metíu en día y vasos, glayará d’alderique qu’esti país va al debalu polos políticos que tenemos.

Y de lo xeneral vamos a lo particular, n’orde deductivu.

Estos díes hai en Xixón la babayada de les xornaes de la sidra, con planu y too como’l planu d’un metro enfiláu. Alcuentra usté marabayu xente con pañuelu verde al pescuezu n’asturianía de Cherines, que ye la de la sidra y el cachopu a fartar, esa asturianía que mexa de gustu colos premios Princesa d’Asturies y el pueblu exemplar, esa del bablianu (metá bable, metá castellanu) que nun pasa del qué ye, ho y al platu vendrás, arbeyu. ¿Cómo nun vamos ser la risión d’esti reinu, el descoyone nacional con un AVE que nun cuerre más que la mio Piaggio Vespa PX 150? Los paisanos agüeyen el Marca y coles sos muyeres, qué ye, ho, beben culinos de sidra. Neso tamos paraos dende yo qué sé cuándo, faza piquiñina que suaña’l suañu del grandón y que nun quier nin a la so propia llingua (los que falen bablianu falen agora de “babloa”). Tamos bonos, Cherines; dame sidra, dame soma. Que a ver, que nun ye que yo tenga nada escontra la sidra, nun sé si m’entiende; que me presta chalo, escancialo con ciertu estilu dende bien alto, españalo bien nel vasu. A min lo que me fadia ye’l simplayu que nun pasa de la sidra, que nun ve más allá d’esa mierda cachopu que, ya lo dixi una vegada, ye una bona manera d’estropiar la carne bono o disimular la carne malo; esi simplayu al que-y da igual la complexidá cultural y socioeconómica d’esta ñación sistemáticamente escaecía, complexidá que sustenta necesariamente na so llingua: si nun hai lligua nun hai ñación y si nun hai ñación nun hai respetu; si nun hai respetu nun hai nada: munchu folclor provincial, Asturies de zoolóxicu, Cherines chachachá. Desconozo si cola cooficialidá esta vergoña de güei va tener igua; lo que ta nidio ye qu’ensin cooficialidá nun la va tener. Les ñaciones tienen les sos lleendes del orixe, a ver si va usté creyer na lloba de Rómulo y Remo; Cataluña inventa muncha historia p’afayase ñación política amás de llingüística; y a nós quieren agora quitamos el mitu la gran batalla Cuadonga, y yá toi viendo que vamos dexanos, qu’Asturies ye guapa y mui verde y paraísu natural pa foriatos entamando per Madrí, que mos pon un AVE que fina en Llión y vivan los reis d’España. La nuesa Asturies que ta na tiesta ñacional de les llaceries y nel rau de lo bonancible y prestixosu. Qué ye, ho. Asturianos de tola vida y toa condición que rin cuando sienten falar n’asturianu, arrequexáu por nós al usu payasu de versiones de películes, al teatru costumista d’aldeanu d’aldega que nun ta más que nel maxín del imbécil o llistu qu’escribe los testos. Asina cago yo pa la sidra y pal cachopu y les sos xornaes, la madre que mos parió.  

Llibre eleición llingüística… Hai que ser fíos de puta.

VILLAMAR

Güei diome’l testu’l mio amigu l’albeite coles sos dos semeyes de Cuideiru. Alcuérdome de que yera 1991 porque pa entós asoleyaben unos cartelos de los xuegos olímpicos de Barcelona, cuando Barcelona yera más España qu’España y onde Prefelipe VI pasiaría la mariellocolorada del Estáu en lloor y golor de multitú y cuando la oveya prieta y la llechi prieto d’esti país yera l’anguaño adomáu y apeselbáu País Vascu. Tábemos na segunda metá de 1991 qu’ente contratu y contratu pa trabayar pal Santu Oficiu ficháronme pa facelo nel ISM nes oficines de Cuideiru, que taben enantes del cartelu que ponía Cuideiru, cuido yo qu’entá en Pozu o en tarrén de naide. Ún fai bien de tiempu que tien el culu llantáu na siella del Santu Oficiu pero entós diba d’un llau pa otru pa onde lu diben llamando: yera mozu, España taba de puta ma y tovía creyíen, España y elli, que diben xintar el mundu, España yá, elli dempués d’amatar les pantasmes. Elli taba tovía nuna edá rural y Cuideiru paicía-y demasiao grande, asina qu’alquiló planta baxa d’una casa en Villamar, pa enriba Cuideiru a mandrecha les postales, y coles sos pantasmes zarróse ellí escribiendo testos depresivos y pintando velees a la cera que-y quixeron asoleyar nuna galería municipal fasta que dixo que non, gracies. Cerveces, güisqui, lletres y dibuxos y setenta y dos hores siguíes metíu no fondero la cama nun pozu de nueche de persianes baxaes. La vida y les ganes de muerte de la mocedá naquelles dómines de Felipe Glez. Coses que me recordó’l mio amigu l’albeite coles sos dos semeyes de Cuideiru, peronde anduvi un iviernu ensin turistes xugando a les cartes, al axedrez, xintando tucu y cenando tortielles d’espárragos na mio mesa atrucada naquel chigre de Pozu onde engordé diez quilos de güisqui, vinu, cerveces, pataques frites, pote y fabes. Eso sábelo bien una amiga del Fb. Y lo putes que les pasé per dientro. 

Un llicenciáu en sicoloxía alloriáu emprestóme dellos llibros fatos que más que lleer tragué al desesperu. Digo agora que nun conozo sicólogu, llicenciáu nello o estudiante d’ello al que-y furrule bien la tiesta. La sicoloxía, como la teoloxía, ye l’arte perder estudios y tiempu nun campu que nun esiste, fenomenoloxía del celebru. Normal entós qu’allorien y llean llibros alloriaos. Dalgún mieu o deficiencia mental los lleva a estudiar teoloxía o sicoloxía. Lleílos y al mio favor argumento que yera nuevu. Esos babayos toi xuru de que siguen nello con tou l’enfotu de la vida entera a la mierda. Allá ellos. A lo menos d’aquello saqué una muyer que me llee y que fala conmigo d’arquiteutura románica, cosmoloxía y llingües nesa tertulia de los xueves de funcionarios nun alcuentru de la enseñanza, les telecomunicaciones y la sanidá nel que nun se fala nin d’enseñanza, sanidá nin telecomunicaciones como nun seyan les de los radiotelescopios del SETI o les naturales de los furacos prietos, que radien daqué a la llume colorao de los Praos Reis.

NA SEGUNDA DIVISIÓN DE LA MEDRANA

Quien nun tien fíos coleiciona muertos, y vivos yá cola punta los deos nel mar de la eternidá. A quien nun tien fíos el futuru se-y amuesa finisterre’l tiempu. Quien nun tien fíos lo que tien ye pasáu, vector p’atrás, y el puntu presente quien nun tien fíos úsalu pa recordar. A un pá, más que’l so propiu fin, da-y llercia la muerte adelantada del fíu: eso que tien ganao, pos la disolución propia xuega na segunda división de la medrana. Un pá paezme qu’a cierta edá ta más preparáu que yo, el del finisterre’l tiempu, pa morrer, como’l gatu que pa ello s’escuende. Porque un pá acostuma a sentise prollongáu nel fíu.

MAESTRU

Consecuencia de que'l máster sía'l magister llatín pasáu pel anglocabrón ye que'l maestru, nesti circu de la España del sieglu XXI, tea amenorgáu al payasu qu'acaba dimitiendo. Otra pallabra noble que foi a la mierda.

ENTE LLIBRU Y LLIBRU, TRÉS VEGAES MUERTU

Echáu a la perllonga, a la solombra lleendo a mios deleres, sintiendo'l sol de lloñe, como me presta sentilu,  nun vienes a la piscina?, to bien equí, gracies, fiyoide; tienes un pitu?, tán ehí, cueye un. Fasta que'l nietoide nietu de la so güela camudóla en robó y tuve de mercalu, estropiáu, y ta llueu la llectura porque media hora pa igualu cola caxa multifunción al preste'l xuegu.

Güei tayóme'l pescuezu tres vegaes cola de Ben-Hur.

LLEICIÓN NOVENA. LA CADARMA VIEYA QU'ECHÓ PELA VIDA QUE LA PUNXO PINGANDO (II)

Pa qué más pos colo que ye de so, güesos, xuegos, l’espinazu, yá tien bastantes llaceries. La cadarma que llee, la cadarma que ve Tele5, toles cadarmes que pasen del mediu sieglu, tán más o menos feches mierda, van atopando peax tres peax pa vieyos nes autopistes de la vida. Vieyos como perros llambiéndose les firíes nes urxencies del Santu Oficiu. Firíes que-yos apurre la vida cabrono per aciu’l maxín, les coraes o la cadarma a la cadarma que llee y a la que ve Tele5.

LLEICIÓN NOVENA. LA CADARMA VIEYA QU'ECHÓ PELA VIDA QUE LA PUNXO PINGANDO (I)

La cadarma, anque nun les tien, entrúgase cómo andarán les coraes. Nun les tien pero creyéndose cadarma que llee o cadarma que ve Tele5 como si les tuviere y asina siente ferver el sangre, arder l'estómadu; ve que la vexiga suelta delles vegaes el mexu como un atascu nel cruz de la carretera la Costa con Menéndez Pelayu; con tantu tintu'l fégadu y los reniles vaiga usté a saber.

REDONDU, CUADRÁU

O nun-yos interesaben los ángulos o nun sabíen qué cosa yeren. Debíen ser solares, tien tola pinta. D'eso paezme que sabe l'albeite, que yá me correxirá si da'l casu. Los romanos, que yeren paisanos perorganizaos, xente de llei y orden pa lo de so, enemigos de los espacios en comuña, meses redondes y demás baturicios circulares, nos que la clasificación y la xerarquía son imposibles, fixeron cases cuadraes, fáciles de compartimentar ya intraxerarquizar pola mor del ángulo reutu. Quiciabes toi escribiendo como un pollín. Dirálo l'albeite, que yá taba neso lo menos en 1982.

DOWNSIZING

Siendo conscientes de que'l tamañu les coses y los paisanos ye relativo, asina y too ye conveniente xubir de xemes en cuando a la Campa Torres pa ver a los seres y enseres como si foren figures d'una maqueta a escala de númberu con dellos ceros.

FONTE DE TIEMPU

Fai bien d'años saqué-y una semeya a una moza, la fonte detrás d'ella. Tábemos nel entamu la rellación, lo que quier dicir que mos prestaba tar xuntos. Ella tovía nun conocía los mios llaberintos, yo inda nun sabía qu'ella cola tiesta esbarrumbaba una parede. Perhí, ente les obres completes de la casa, andará la semeya, toos con venti años menos. El casu ye qu'ayeri topé con ella (cola fonte) de casualidá, en Ruedes.

‌SÓLO TABA CALEYANDO
‌
‌Nesta semeya entama la cuesta que xube pa Picalloréu, camín bien pindiu a vegaes que ye a cachos carretera, a cachos carrera, a cachos caleya, pero la Vespa envízcalu a ún, segunda, tercera, segunda, y ún nella tira pa riba, siempres tira pa riba esquivando furacos y grixu ensin parar muncho a pensar que a lo meyor llueu tien de baxar pel mesmu camín, como asina foi. 
‌
‌Pasando'l lletreru de Picalloréu, que ye un llanu nel altor de la llomba (cases nun fui quien a veles), al otru llau d'una vuelta (aquello yá yera caleya) topo cola bucólica estampa d'unes cuatro o cinco vaques que vienen pa mio a bon pasu y el vaqueiru qu'echa a correr pa escontra min.
‌
‌-Oi, oi!
‌-Échome pa esa curva d'ehí?
‌-Non, por Dios. Prefiero que deas la vuelta y baxes fasta pasáu'l cruce u ta'l pueblu anterior.
‌-Y eso?
‌
‌Y ye equí que surde l'imperativu categóricu.
‌
‌-Ye que vien detrás un güe que nun ta acostumáu a les motos.
‌-Hostia! Nada, nun te preocupes, que nun diba a dengún llau: sólo taba caleyando.

ESPECULANDO DE COYONES

Escueya usté enerxía escuro o tirón gravitatoriu d'un universu paralelu, gravedá o holograma, billocación o ondes guía. Grecia especuló l'átomu y nel XX especulemos les cuerdes. Si remembro bien, la rellación de tamañu esistente ente una cuerda y l'átomu básicu, que ye'l del hidróxenu, ye la qu'hai ente esti y l'universu visible. Seguimos, pues, especulando de coyones.

Pal interior daben de too incluyíos rayos y truenos poro anque nun mos preste muncho y menos en branu colamos de Xixón pela autovía de la faza costera dispuestos a arramplar ún a ún con tolos minutos y segundos del domingu famientos de lo que nomen bon tiempu.

LLEICIÓN OCTAVA

Facese veceru del chigre'l vinu ye una manera como otra cualesquiera de caltener la tiesta nel so llugar, que ye'l llugar de los güeyos bien abiertos y les oreyes atentes, les xenxives zarraes col gargüelu quietu, los párpagos plegaos parada la llárima y el cazu bien alzáu, que se note con los llabios serios y el papu defendíu. El mundu ye la puta viesca selvaxe. Facese veceru del chigre'l vinu ye caltener el tiempu adomao, la seguridá na vidaya, el dentame entero salva la tenyera ensin mexelles colloraes. Metiéndonos no fondero la tiesta ye lo principal. Darréu'l vinu y les venti páxines que-y da, marcha vusté pa casa a arrequexase de too y toos y de vusté mesmu, en cuantes el tiempu lo diz, namás el tiempu lo marca, nel índiz del tiempu, nun vaya vusté chiscase de mierda.

SPAIN IS DIFFERENT

Nun escaezan que n'Europa nun hai país como esti. Un pecáu que val pa siguir en "Cúntame" o nel Barsa nun val nin tien de valir nin pa siete díes de ministru "d'esquierdes". La seleición española de fútbol quedó ensin seleicionador a un día del Mundial. Ablucamos con Trump y Kim y mire usté'l ganáu qu'equí llega a lo cimero.

N'ESCESU

Ún, entós, quixo facer les obres con tantu procuru, tanta perfeición neurótica inabarcable, que fracasó, cómo non. Les coses nun podíen ser tan difíciles, y pa los que siguieron p'alantre nun lo foron, pero pa él, pa ún, pal maxín d'ún, entós, neuróticu, facelo fácil yera una chambonada: el mundu nun podía ser tan fácil. Agora sabe, agora, a bones hores, que l'escesu de procuru ye la chambonada. Fasta beber agua n'escesu ye malo.

CELIA CHACHACHÁ Y LOS QUE SALEN A LLUZ

Tien tamién de bono'l trunfu esti de la moción de censura que salen a lluz y llume los votantes del PP, la España esa de pesllao y sacristía. Presta abondo velos esvergoñaos coles sos vergoñes y el sangre del abortu espantible de la llexislatura al aire.

NON FASTA DEMPUÉS DEL CUARENTA DE MAYU

Nun has coyer vacaciones fasta dempués del cuarenta de mayu sacantes quieras pasar la selmana viendo películes. Asina qu'albidrando'l tiempu que mos venía percima furé y furé nun granín que taba na vidaya y camudélu en cuernu l'abondanza'l pus qu'hubieron sayar, los párpagos del güeyu malu como globos. Ehí, nin, nin una povisa, y nun sudas muncho. Esta selmana, que taba acutada pa obres, pa finales, porque ún ye consciente del refraneru, foi la selmana del festival de cine particular: hebo díes nos que fasta cinco películes, los dos llibros de rigor reposando'l suañu los xustos cabo la cama.

VALLADOLID 3-1 SPORTING

Que l'abicañu del Sporting esta temporada ye feble amuésenlo los trés ciclos pelos que pasó, ta pasando. Fíxose otra vegada un equipu un poco Frankenstein y cuando paecía que yá non, que les mancadures y los remiendos yá taben iguaos, surdieron de cote (porque la cortisona ye lo que tien: que los sos efeutos duren lo que duren) y morrió'l soñín: marafudiáremos el capital aforrao como'l bon ciclotímicu que somos. Y neses tábemos que fuimos a Valladolid a nun sé qué: un Sporting nun eso nin aquello nin nada de nada al qu'en nueve minutos-y frayaron el morru. Nun abluquemos porque esperábemos daqué paecío y paez que tán dándose los albidros d'aniciu: Zaragoza y Valladolid na final. Menos mal que cuando too asemeyaba que diben dexanos ensin dentame baxó del cielu un talu Yoni y fixo gol, esi gol que mos llevó del imposible al quiciabes. Esi umeru escosu de Machado que n'El Molinón-Quini igual bilta. Quién sabe, hom. El Sportinguista ta avezao a garrase a un clavu ingrientu.

LLEICIÓN SÉPTIMA

Que los guah.es del B tengan superao’l primer exame d’ascensu tendría qu’enguizar a los mayoronos. Ver veremos.

(Vimos Sporting 2-1 Granada.)

Cenando ceo. Nun se pue dir agora mesmo a los chigres que davezu presten porque la reciella escomanao de la oveyada madrilista ye’l cáncanu de xemes en cuando espardío qu’acaba col texíu orgánico sano de los llugares pacetibles. Asina que ye poner al fueu vitrocerámico la pota que vaporiza sol pitu y les pataques; echar llueu, tayáu, el pitu a la payella ingrienta; con cuyar y cuyar voltiar los cachos; sacupar el sartén volquiándolos en platu y añade-yos pimienta prieto. A les pataques un chorrín d’aceite crudo d’oliva puro y pimentón picante colorao. Un vinu, o dos, o trés, y el bañal pa mañana, que ye domingu. Y a ver, cenáu ún, la segunda temporada de “El cuentu la criada”.

...

Per aquelles dómines ún movíase esbocáu per una espiral pindia llueu de querer frenar en seco. Ta pasándo-y a muncha xente pola mor d’un mundu onde la xente ye oxetu de mercáu, oxetu que ta pa mercar oxetos. Ente tantu oxetu danos que mos tán empobinando a un futuru d’intelixencia artificial nel que les máquines van mercar máquines fundía la realidá nel trunfu de la Cosa. Nun presten estos tiempos emprestaos pol mercáu.

LLEICIÓN SESTA. PA NUN CAFIAR 

Tán bien les nueches del vienres p'abellugase del abeyar de la xente, de los neños malcriaos de güei, de los sos pas, que se malcriaron por causa nós o de los nuesos hermanos mayores. Toi falando d'esos guah.es qu'allorien a ún colos sos pas trentañeros los güeyos llantaos nel smartphone, más autistes, pas y fíos, imposible; toos diendo drechos pal futuru d'alimentu fato pa los morlocks.

P’hachonialo too y mercar muebles nuevos, nin. 

Pa nun cafiar, nun se ye pá y Santes Pascues. Nin home de muyer que quiera ser ma colo d’ún. Que guete a un pinín.

Nun siendo pá, llibrámonos de fíos cafiantes, llibrámonos de ser güelos de nietos cafiantes, llibrámonos d’un futuru inciertu de bisgüelos de bisnietos cafiantes, llibrámonos de xenros y nueres cafiantes; llibrámonos, de fechu, d’un montón de xente. A los sos deleres anda ún, que nun manca a naide nin naide lu manca. ¿Pa qué más? Allá quien quiera siguir el puxu biolóxicu.

Tán bien les nueches del vienres p’abellugase del abeyar de neños y pas. 

HOMES Y FORMIGUES

Escurque nun sintamos a naide non porque la galaxa sienta medrana sinón porque tamos guetando con primitivos walkie-talkies xente que comunica per whatsapp.

Una mierda como un castiellu ye la hipótesis de que yá tamos en contautu con estraterrestres pero los gobiernos escuéndenlo. Rexistro esto porque hai munchu simplayu que lo creye.

Al meyor ye que les civilizaciones avanzaes tiénenmos vixilaos y prohibío rellacionase con nós mientres nun teamos preparaos, o cenciellamente tán delantre les nueses ñarices y nun somos a veles y nós pa elles como si fóramos formigues. O, yo qué sé, quiciás somos la simulación informática de dalgún graciosu na que nun hai programaes más civilizaciones que la de nueso.

Fin.

La ecuación de Drake:

N: númberu de civilizaciones capaces a ponese en contautu con nós.

...

R*: númberu d’estrelles que ñacen cada añu y duren como pa poder desendolcar vida.

Fp: fraición d’eses estrelles que tien planetes orbitándoles.

Ne: númberu d’esos planetes que ta asitiáu na zona u pue dase vida.

Fl: númberu d’esos planetes nel que surdió la vida.

Fi: númberu d’esos planetes nel que surdió la intelixencia.

Fc: númberu d’esos planetes nel que la intelixencia ye a comunicase con intelixencies d’otros planetes.

L: tiempu esistencia d’eses intelixencies comunicatives.

ALIEN

¿Y quién-y diz a usté que na galaxa nun rixen les lleis de la xungla, na que la primer civilización qu'algamó'l tipu 3 nun dexa qu'espoxiguen les demás? Un alien de Ridley Scott un poco más elegante que por simple economía recursos tea esperando a que mos destruyamos solinos ensin ayuda naide pero que como vea qu'entamamos a espuntar como un virus esmadráu nun mos va dexar dicir nin ai. O un bichu un poco más atrasáu pero igual de cabrón (l'alien de Ridley Scott) por aciu del que la galaxa entera menos nós, que somos los novatonos bocayonos, calla como una puta les d'enantes. ¡Hola, hom, tamos equí!, que cantarín cantaría'l METI.

SAN JUNIPERO

Digo yo que pa cuando la Cartaginensis, la Baetica y la Tarraconensis taben yá falando sum, es, est, sumus, estis, sunt, nel llugar onde vive’l mio amigu l’albeitre nin noticies teníen de los romanos, qu’emplegaron doscientos años en facenos falar llatín a cuasi toos. Agora imaxinen que los romanos son eses civilizaciones de tipu 2 y 3 de les qu’escribiéremos y que los del pueblu del albeitre somos nós, que vivimos nos arrabaldes d’una galaxa na que se fala telepatía universal mientres equí siguimos falando gallegu, castellán, asturianu y hasta inglés.  

Párrafos como esti salen d’albidrar que la nuesa galaxa, el nuesu sistema solar, la Tierra y la nuesa intelixencia nun tienen nada de particular y que polo tanto hai intelixencies perhí a mamplén, a dar con un palu. Que nun sepamos nada d’elles buscándoles como tamos buscándoles nun radiu de 100 años lluz, que ye como buscar nel salón de la to casa les llaves que perdisti andoliando pela cai, qué quieren que-yos diga.

Más o menos intelixentes, los humanos andamos faciendo y desfaciendo va 50 000 años, y escribiéndolo dende fai 5 500. Ablucar igual ablucaron unos dinosaurios o unos simios énte l’actu de presencia de naves estraterrestres, o unes tribus de neandertales o cromañones, pero nun fueron a dexalo grabao pa los homes del futuru.

¿Alcuérdense de la esfera de Dyson de les civilizaciones del tipu 2? Guapamente fixeron dientro d’ella un paraísu que pa qué diben querer salir a la mierda del universu esterior. Ya nun digamos una de tipu 3 que tea almacenada n’ordenadores cuánticos esfrutando d’una vida eterna y feliz (el San Junipero de Black Mirror). 

Y NUN SENTIMOS A NAIDE

Quiciabes porque l'universu tea entamando agora a dar vida intelixente, que desendolca al empar que la nuesa. Tornando al Gran Filtru, si nun ta tres nós tará delantre, y asina sí que vamos fadiaos. A ver: si nun somos la lleche, lo más, los campeones mentales del universu, que ye lo razonable, ye de creyer que la vida nun pasa del nuesu nivel porque enantes cai un asteroide, abrásenla los rayos gamma o autodestrúyese cola teunoloxía matadora.

SOMOS LO MÁS DEL UNIVERSU (MÁS GORDA NUN VA AL PRAU)

Pueque nun heba noticies de civilizaciones superiores porque nun esisten civilizaciones superiores (toma navaya d’Ockham). En dalgún momentu apaez una muria cola que la vida choca. A esa muria con furacos perquepeños nómenla Gran Filtru. Agora bien, ¿ónde ta esi filtru?

Na Tierra fixeron falta mil millones d’años pa que la vida surdiera y nós nun somos a facela. A lo meyor ye que la vida ye un milagru, daqué imposible que sin embargu ta equí (hailos que falen de la perdifícil suma condiciones que se dan na Tierra –hipótesis de la Tierra especial-).

O que dempués que ñacieron les célules procariotes procariotes quedaron pa dos mil millones d’años. Si esti ye’l Gran Filtru, l’universu tará enllenu célules procariotes, pero nun habrá más.

Steven Pinker refuga la idea d’un ascensu inevitable de la evolución, que nun va escontra denguna meta sinón qu’a cencielles ocurre pa l’adautación de la vida al so nichu ecolóxicu. La intelixencia teunolóxica nun tien por qué ser obligatoria y la vida pue perfeutamente quedar en chimpancé.

En tou casu, polo visto fasta agora, el Gran Filtru ta tres nós, pasémoslu. Somos la intelixencia teunolóxica del universu, lo más, la hostia en versu.

BIENVENÍOS A LA PARADOXA FERMI

Y, espaciu aparte, ta’l tema’l tiempu. L’universu tien –afirmen- trelce mil quinientos millones d’años. Poro, hai soles muncho más vieyos que’l nuesu, bastante nuevu. Vamos comparar los 4 540 millones d’años de la Tierra con un planeta de 8 000 millones. La teunoloxía d’unos paisanos que mos llevaren mil años sedría tan rara pa nós como la nuesa pa un paisanu medieval. Val. Un millón d’años d’adelantu dexaríanos énte ellos como si fóramos chimpancés. Coyonudo. El planeta esi llévanos tres mil cuatrocientos sesenta millones d’años. Hai una escala nomada “de Kardashov” qu’axunta en trés grandes grupos los tipos posibles de civilizaciones: les de tipu 1 usen tola enerxía del so planeta (Carl Sagan dixo que nós tamos en 0.7); les de tipu 2 aprovechen tola enerxía del so sol (esfera de Dyson); pa les de tipu 3 la galaxa entera ye’l patiu la so casa. Y lo normal ye pensar que’l planeta esi de ocho mil millones d’años tenga una civilización de tipu 3, ¿non? Inclusive a velocidá baxa, con aparatos que faigan copies de sí mesmos de planeta en planeta nuna progresión xeométrica de fautor 2, tendríen colonizao tola galaxa en tres coma setenta y cinco millones d’años, que son una purrela manexando años como los tamos manexando. Y siguiendo cola especulación del un por cientu, habría mil cien civilizaciones del tipu 3 na Vía Lláctea, o una pelo menos si tropezaron ente sí muncho y a la fin ganó’l Madrí al Barcelona, o una confederación d’elles (les del motor de curvadura de Star Trek).

Pero nada, oi. A nós nun llega nada.

Bienveníos a la paradoxa Fermi.

¿Ú TA LA XENTE?

Dicen que la nuesa galaxa tien de cien mil millones d’estrelles a cuatrocientos mil millones (10^11 – 4x10^11) y que galaxes hailes tamién a magullu, una por cada estrella de la nuesa galaxa (10^11 – 4x10^11). Facemos les multiplicaciones: 10^11x10^11 y (4x10^11)x(4x10^11) y sálennos 10^22 y 16x10^22 estrelles nel universu que vemos, que son de diez mil trillones a ciento sesenta mil trillones d’estrelles. L’universu que vemos ye pergrande.

L’universu más pequeñu de los científicos nun se pon d’alcuerdu nel porcentaxe d’estrelles que ye de tipu solar (del cinco al venti por cientu). Vamos tirar pelo baxo y calcular el cinco por cientu del mínimu 10^22: quinientos trillones d’estrelles de tipu solar nel universu visible. Soles a pataes.

El mesmu rebate que pal númberu d’estrelles hailo pal númberu d’estrelles que puean tener orbitándoles un planeta como la Tierra. Equí los porcentaxes van de la metá d’elles al ventidós por cientu de la PNAS (Proceedings of the National Academy of Sciences), que deber ser la hostia d’academy. Vamos siguir siendo rancaños y usar el ventidós; el ventidós de los quinientos trillones de soles: cientu diez trillones de Tierres nel universu; 110 000 000 000 000 000 000. Escríbense pronto.

Y agora a especular.

Pongamos por casu que dempués de miles de millones d’años l’un por cientu d’eses Tierres desarrolla vida, anque seya la vida de dalgo paecío a una bacteria: un coma un trillones de Tierres con vida. Imaxinen a estes altures del testu que nel un por cientu d’esi un por cientu de Tierres les bacteries avancen fasta formes intelixentes (quier dicise intelixentes como nós, si ye que lo somos): once mil billones de civilizaciones. Son munches, ¿non?

Dividiendo esti númberu ente los cien mil mínimos millones de galaxes sálenmos cientu diez mil desendolcos científicos, culturales ya ideolóxicos na Vía Lláctea. Un bon númberu, ¿nun-yos paez?

Si too esto nun ye l'esvariu d'un fumáu y realmente hai como mínimu cien mil cultures alleníxenes na nuesa galaxa, ya inclusive si solo una pequeña parte d'elles ta unviando señales, ¿ú ta la xente?

EL GRAVE PROBLEMA ESTÉTICU DE PABLU CATEDRALES

Comentábemos güei que’l problema la casona Pablu Catedrales ye más que nada un problema estéticu. Si Pablu Catedrales, en llugar de mercar el xalé Lola Flores, merca una casa pueblu bien curiosa integrada nel mediu rural, amás pola metá preciu, pola metá de pufu, nun tendría pasao nada o a lo menos nun rompería la imaxe que tenemos d’él o él quier danos. Porque, vamos ver, ¿cómo voi confiar agora nun hortera con piscina d’hotel marbellí? La horterada, créyanlo o non, diz muncho d’un paisanu.

N=R*FpNeFlFiFcL

L'universu ye bien grande como pa falar de paradoxa Fermi. La galaxa tamién. Si la primer señal que salió al espaciu foi la de Hitler glayando la superioridá física, intelectual y moral del atleta ariu, allá en 1936, la babayada tien andao ochenta y dos años lluz y nin los albidros más optimistes basaos na nomada ecuación de Drake dan un númberu de civilizaciones tan eleváu como pa que mos tuviera yá retrucao dalguna d'elles. Asina que tranquis: d'equí a mil quinientos años el silenciu ye normal, ensin paradoxes.

PABLU CATEDRALES

¿Cómo yera aquello de que non solo nun hai que ser puta sinón tamién nun paecelo? ¿Y cómo yera aquello de qu'una cosa ye predicar y otra dar trigu? De baramonte, Pablu Catedrales esanició l'espíritu la esquierda social pa quedar yá a seques en, yo qué sé, un marabayu de xéneru llingüísticu d'esquierdes. Qué pena de rapaz. ¿Que qué me paez a mio la casona de Pablu Catedrales? Una horterada; la horterada típica del qu'arreniega de sí, del que quier ser lo que nun ye. Lo que quier ser al empar d'un discursu políticu qu'en boca yá bocayona d'él yá tampoco nun ye.

HOMES EXEMPLARES D’ADÁN FATU

Dicíen abenayá que les muyeres son la perdición del home, nesa tradición que vien de la Eva mala y l’Adán fatu. Sedrá l’empuxón de la bioloxía, que lu fixo pa metela en cuantos más furacos meyor. Esa necesidá imperiosa d’afuracar. Dicíame’l señor Calvu, ún que fora lexonariu, ¿sabes qué, Joan –nomábame asina, “Joan”, pronunciando “ye”-? Si’l home nun tuviera un coñu ente ceya y ceya taría agora viviendo en Marte. Colos mios ventinueve años d’entós mirábalu metá como quien mira a un marcianu, metá va tener razón pero pa qué queremos tar en Marte. Pos a lo que díbemos: homes exemplares d’Adán fatu son los de la Manada. Díbemos a que diba siendo hora que’l retrasu mental fora castigáu con pena mayor de cárcel porque -zarran los güeyos, pongan tapones nos oyíos- paezme a min que son culpables de dalgo que fixeron pero nun ye; nun sé si m’esplico. De toes toes, allégrome de nun tener fíos (sobre manera fíos como esos) nin fíes (sobre manera fía como esa) nesta democracia va tiempu dexenerada en fatocracia alzada en xuez. A too esto, ¿qué-yos paez la casona de Pablu Ilesies? ¿Ye guapa, eh ho? 

UN CUCHIELLU CARNÍVORU D'ALA DUCE Y HOMICIDA

Nun veo yo qu'alimentándose de minerales y faciendo la fotosíntesis n'otru planeta esti vaya dar plantes más intelixentes que'l nuesu nin que comiéndoles a estes, que d'u tán nun se van mover, esi planeta en ca Dios tenga dao herbívoros que tengan algamao los secretos más fonderos del universu. L'estraterrestre que puea llegar a la Tierra va ser el mesmu asesín carnívoru cazador que medró equí na Tierra, ovíparu o vivíparu, tiranosauriu rex, tigre, llobu o home. Poro, llanzar al espaciu sondes ofreciéndonos a un fíu puta tan fíu puta como nós pero más teunolóxicu ye siguir creyendo que somos fíos de Dios.

L’Uviéu ganó en Sevilla al Sevilla Atléticu y esta tarde salta a El Molinón un Sporting incógnitu, el nuevu Sporting de Baraja. A ver qué asocede. Lleí que sal con un 4-4-2 (el 2 son Santos y Scepovic) nel que xueguen dos o tres guah.es. A ver, repito; porque l’Uviéu púnxose a ocho puntos de nós, bien empobináu a la primer división col permisu del sobrenatural Cádiz de Barral. 

...

La terraza de la llectura mañanera del periódicu taben afatándola coles banderes del Sporting y el lletreru, que nunca falte, de ¡Puxa Sporting!

...

¿Con cinco entrenamientos col nuevu entrenador, Rubén Baraja, metémos-y un 3-0 al Tenerife tocándola? Nun quiero pensar mal. Lo que se desfizo foi la dulda de si yéramos una puxarra d’equipu. Daqué fondo diba mal con Herrera. Un equipu rotu enantes, nin que lu pegaren con Loctite. Cuando’l cabezaleru te pon a facer un trabayu al que nun-y alcuentres el sentíu, facelu faislu pero salte d’aquella manera: chambón. Nesi sen los xugadores del Sporting fixeron-y a Herrera la cama, trabayando desganaos.

I

El Sporting xuega contra los pequeños del Barça con una alliniación que nin René Magritte: mancadures, plantiya, Herrera, los Fernández... L’Uviéu, que pinta perbién, yo creo que va valtar al Osasuna: el neñu del mio primu ta de suerte, tóca-y ver al so equipu n’alza; ún yá vivió, paezme que pa siempres, les glories del so. A la Cultu, que tien partíu en Llugo, púnxi-y una equis. Toi pensando que teo de garrar la moto y volver un día d’estos a Llión. 

II

El Sporting va de mal en peor. Al partíu eché-y una güeyada ente taragañu de pastel de cabrachu y taragañu de cecina con forgaxes de quesu, ente tragu y tragu de Moneo, que ye un tintu roble de la Ribera del Douru. El partíu, yá d’aniciu, nun daba pa más, nun yera pa velu n’esclusiva. Nun artículu de La Nueva España, que da na diana, fálase de la indiferencia del sportinguista, y nun ye pa menos: fulanos recoyíos d’equí y d’ellí col solu criteriu de que son baratos o salen de baberu: a fin de cuentes, mentes la forofada siga cayendo na trampa una temporada más y retire l’abonu... 

III

Yera más interesante ayeri pela nueche la xente qu’había alredor nel restorán que'l Barça B-Sporting, sobremanera una pareya de barriu fonda: él con un aniellu nel pulgar esquierdu y na moñeca del mesmu llau, n’abierta asimetría corporal, un pelucón del tamañu d’un Pegasu y sobre y so él bayura de pulseres de paisanu peludu y barrigón; ella una paisana col roxu osixenao y los morros españando na vista con un colloráu internacional qu’esaniciaba llendes, nesti casu les de los llabios. Quién diba fixase nel Barça B-Sporting anque’l Sporting yá marcara gol. L’Uviéu tienlo a güevu pa dexar al Sporting pequeñín nel espeyu retrovisor. 

IV

¿Lleva’l Cádiz seis victories consecutives o toi inventando? Dicen que'l llunes despiden a Herrera: a ver per ónde salen agora. Val Dios que ún yá lleva delles temporaes viendo al Sporting como dende lloñe, pa lo bono (poco) y lo malo (pa repartir): atrás quedaron les tardes y les nueches de fríu, lluvia y vientu n’El Molinón. Díxi-yos adiós a los Fernández cuando desfixeron l’equipu de guah.es y viéndose con perres sobrantes ficharon en lluellu, y nun quiero pensar mal. Pero dixi "¿Cómo ye, ho?" y respondí "Díi a tomar per onde amarguen los pepinos".

VAL DIOS

El selfie más mentirosu de tola hestoria ye' l tituláu "The Sounds of Earth", llanzáu al espaciu nes Voyagers en 1977. Val Dios que pa cuando algame la estrella más cercana tendrán pasao cuarenta mil años. Val Dios porque de tan bonos que mos amosamos al estraterrestre paecemos fatos. Y sómoslo. Porque unviar a la bona Dios (aparte toles babayaes flower power de los sounds of Earth) el nuesu ADN y ú tamos sabiendo cómo les gasta la ma Naturaleza calteniendo la vida ye como dici-y al asesín oi, to equí. Val Dios que la tontura esa buenista (y mentirosa) nun va a denguna parte y val Dios que'l proyeutu SETI nun sintió ruíu dalu d'orixe estraterrestre intelixente (¿llimítase a escuchar o emite nel procedimientu d'escucha señal de la nuesa posición?).

USTÉ, VUSTÉ

Ve usté a los neños miralu de frente llantando los sos güeyos nos de vusté y usté cuida que'l noventa y nueve por ciento d'ellos va acabar faciéndolo al revisgu. Por mor de la llei la entropía humana y eso de tanto camentar. Esos neños a los qu'índa-yos cuenten la edá en meses. Allá una vezona foi vusté ún d'ellos y agora albentestate garraría usté la escopeta pa resolver el so desarreglu social. Descá que vusté dexó de tener la boca abierta clisando güeyos ayenos. Pueque la salú mental tea nesi camín que va dende la inocencia del riscar dica'l non fiar nin de so puta ma, dende la mirada direuta a la de revisgu; n'aseñardar en remembrances del tiempu fuxío, amatagao davezu porque usté quier la so salú mental dica la escopeta albentestate masque a vegaes caiga vusté, n'instantes maizonos, en dondo en lluellu, en happy flower power de telefilm pa dempués de xintar y mire usté de frente a los güeyos del so perru.

ESPIRAL ENFILADA

Falando que tábemos de círculos, pa círculu'l de Cataluña (¿o pa espiral?). ¿Pa espiral que tira pa qué furacu negru empuxada pola fuercia los manguanes del PP y el PDeCAT (esi PNV monxarratu salíu de ma)? Cuando-y oponemos al dibuxu animáu del coneyu la suerte del independentismu nacionalista del PDeCAT el conexu la suerte del nacionalismu fatoimperial del PP surden guerres de banderes que puen acabar a fesoriazos. De momentu tamos a tartazos en cuenta de tortazos. De momentu. De momentu tamos nel circu los payasos de la tele. Vamos siguir faciéndolo (el payasu) pa ver en qué furacu negru sume esta espiral, que nun dexa de ser una circunferencia chumada, enfilada, borracha.

LLEICIÓN QUINTA

El procesu ye como vien: l'amanecerín del llunes atropéllate como si fora un camión; el meudía del miércoles inda nun fuisti a llibrate del encañu xeneral; l'atapecida del vienres yá tas sanáu pero más cansáu que Dios el día sestu; cuando cayisti na cuenta ye la nueche'l domingu y otra vuelta más nesi círculu infernal mazcaritáu de llinia recta en llibertá, que ye la xeometría na que te faen creyer pa que nun te pegues un tiru y sigas mercando smartphones. Asina a la que vas pinín pela circunferencia persiguiéndote'l rau nin tiempu ties pa tarrecer lo que de bon xuiciu tarreceríes.

L'Uviéu adelantronos pela drecha: paez que definitivamente dio col pasu del baile del fútbol en Segunda y va como un proyeutil d'arma de fueu, esto ye, como una puta bala. La forofada del Sporting tremez, atetuya, oliva, y lo que a la fin manifiesta ye una angüeña de sudu caliente por aciu de qu'enantes forofada muerto que ver al Uviéu perriba'l Sporting. Lorca 0-2 Uviéu.

...

Xiblíos a magüeyu n'El Molinón. Díxilo fai tiempu: que l'Uviéu, col so xuegu de fuercia de voluntá, diba llegar más lloñe que'l Sporting col suyu de supuesta calidá; y díxilo cuando'l Sporting entá rulaba, darréu l'Uviéu 1-1 Sporting. Agora, yá en cayida llibre, con Herrera estraxáu, tresmanáu, perdíu, y esta purrela de plantía axuntada polos Fdez., los que, temporada sí, temporada tamién, rinse del abonáu, valnos más dir pensando que vamos tragar Segunda pa ratu y que quiciabes-y toca al Uviéu (yá yera hora pa ellos) tirar del carru del fútbol n'Asturies. Meyor nun chisbar el foru enemigu, qu'añader perceguera a la perceguera ye tontería. 

Albídrense esperteyos.

...

El paisanu Herrera tien de dimitir, anque nun conozo a naide que dimitiera nel Sporting, o a lo menos agora mesmo nun me vien a la mente. Esti paisanu Herrera tien de dimitir porque nuna situación asina de casi toos escontra d'él (yo yá diría "de toos") enxamás se solucionó nada: l'ansiedá va pa enriba, ún alloria tou, la perplexidá va ocupando cada vegada más espaciu cerebral, unu termina nun entendiéndose a sí mesmu y los demás fuxen mentalmente d'él. Y, con estes, el Sporting por coyones al carayu. Tamos a tiempu: daquién de la casa que sepa cubrir los furacos con guah.es del B. Nun ye que vaigamos xubir a Primera, pero la xente diría a El Molinón cola ilusión de dir a acompañar a lo que ye de so.

Lo qu'al entamu paecía que diba ser (lo que-yos paecía a dalgunos) un pasu de baille pela Segunda (siempres tamos con lo mesmo: nun deprendemos) tresformóse (como siempres) na cueña que ye cueña pa foriatos pola senciella razón de que la Segunda, si nun yes ún d'equí xugándote l'escudu con tol sudu pol mugor d'esta tierra d'iviernu, ye un meru trámite garbanceru, un trabayu de mierda. Ser un Real Madrid probe ye la ruina. Los Fernández son llistos: los fatos son los que dempués de tantos años siguen creyendo y abonándo-yos el piensu a esos manguanes de la Planta Podre.

...

Diz Cos que creye qu’Herrera creye lo que diz: si lo creye Herrera, sedrá Herrera un fenómenu de la anagnórisis, o tará llocu, o perdería nel afoguín les caberes neurones funcionales; si nun lo cree, sedría pa tiralu al Piles, como dixo Cos que diz Sartorious. Y digo too esto embaraxando (eso velo cualquiera) un Sporting amenorgáu a cuasi nada poles mancadures, nun m'alcuerdo d'ónde lleí que toes d'isquiotibiales, y un Herrera que nun ye a echar mano de los neños del B. Asina que pinten bastos, creya o nun creya'l paisanu Herrera.

LLEICIÓN CUARTA

Afirmen los entendíos que’l tiempu ye relativo porque depende de la gravedá y la velocidá. Yo afirmo que’l tiempu depende de tar trabayando o tar de vacaciones. Aprovez el tiempu del qu’aprobez pero tamién el tiempu de quien trabaya y nun arriquez. Xineru, febreru, marzu, abril, mayu, xunu, xunetu, agostu, setiembre, ochobre, payares y avientu, dolce gravedaes pesaes nes hores de Santu Oficiu; primavera, branu, seronda, iviernu, cuatro estaciones espaciales a toa mecha n’órbita de contino alredor d’esti furacu onde to metíu. Yá ven: nun ha dir ún mui lloñe nin a la velocidá la lluz pa sentise Einstein.

LLEICIÓN TERCERA

Nesti mundu enlleno gallos y castrones, pollinos y oveyes, al atardecerín presta abellugase nel chigre au'l vinu. Fáiseme que va dir pa llargo: bonos pinchos de magullu col vinu, bon wifi, y si quies picar daqué de pagu yá quedes como Dios.

Esti bichu, que tien más de güe mansulín que d'otru bichu si nun-y caciplen nos coyones, va a recoyese na corte.

LLEICIÓN SEGUNDA

El mundu azul ye pa los campos mariellos. Pal verde equí moramos nel mundu buxo prieto como los coyones d'un burru. El mundu azul ye pal mariellu y el pardu. Al verde aprovez más l'infiernu d'agua cayendo pa nun ponese roxu; dende l'orbayu 0,1 fasta'l bastiazu 1,5. L'infiernu ta na constancia, na aburrición pa cola agua. Equí ye normal que nun faiga azul de va selmanes. Col azul, equí, los alverbios "cuantayá", "abenayá", "cuantisimayá", "amunchayá" son la llinia defensiva d'un equipu que dexó cuantisimayá de xugar al ataque, moldiáu'l calter como se moldia una escultura de sable cuando-y pasa'l Cantábricu percima.

LLEICIÓN PRIMERA. LES COMÍES DEL SPORTING

El Sporting almorzó un bon batíu carbohidratos pa dempués nun tastiar un res na xinta. Afamiáu, merendó nun sé cuántos equipos siguíos fasta facese'l más grandón de la Segunda. Agora tóca-y la cena y nun sé yo: nun lu veo tragando esos cuatro bocaos caberos. Munchu pan y rellenu pa dempués de tener ganada la merienda. ¡Coméi, nun esfallecer! Nun lo veo. El Rayu tien fame pa cenar too lo que-y echen y al Güesca van meté-ylo con sonda nasogástrica. Cuatro partíos: nun-y vaga al Sporting l'ascensu direutu.

LA TRABE NOS GÜEYOS. SPORTING 0-3 CÁDIZ

L'equipu vecín, que ta otra vegada enfotáu, tien exame en Valladolid. Trés victories siguíes y a ver quién ye a lleer La Nueva España. Amás, un Sporting duldosu recibe al Cádiz, que siempres foi un equipu que fai un fútbol mui llocu. 

...

Güei lleímos serenamente La Nueva España, sapozáu l'enfotu l'Uviéu, que perdió por trés goles a un en Valladolid. Santos, nel Sporting, paez que vuelve a xugar d'estremu, qu'onde quier xugar xuega Scepovic y nun hai equipu, que se sepa, que xuegue con dos delantreros centro. Enfrente, pa coranos, ta Barral, que diz que si mos xinga nun lo va celebrar, como ye costume ente los bonos ex. Nun pidimos que se faiga la fola n'El Molinón: conformámonos con que'l Sporting, ensin munches esixencies de xuegu guapu, saque namái los trés puntos pa tar ehí colos d’enriba. Yá desendolcará un fútbol de puta ma nun futuru alloñáu. Pos eso, que no qu’enantes que camudara la hora yera l'atapecer, a les 20,30 entama'l Sporting - Cádiz, güei nueche zarrada.

...

Entama l'alcuentru. Ganar pa ponenos segundos o terceros -depende de lo que faiga’l Granada-, nesa bayura d'equipos qu'aspiren a xubir a la primer división.

...

Uf... El Sporting, ensin dengún asturianu, nun va nenyuri: lo de tola vida, y nun deprendemos. Nun deprendemos que nun hai forma de que s’afayen foriatos con foriatos.
...

El Cádiz acaba de metenos el segundu. Herrera va salir mui mal paráu, anque equí teamos no habitual, no de siempres: ¿esti equipu que mos vienden como la meyor plantía de Segunda ye pa tanto?, ¿ye permalu?, ¿ye Herrera, que nun sabe? Lo que cualesquiera sabe porque lo ta viendo ye que'l Sporting ta en cayida llibre y ensin pinta de solución. Herrera sentáu, alloriáu. La xente pita. ¿Qué pita la xente? ¿A quién pita? Porque los que cuantayá se fixeron col Sporting ende tán, con tol cuayu (refiérome a tar al mandu, porque d'El Molinón güei yá se fugaron: pa mexar y nun char gota). La xente fuxe, sal d'El Molinón, vase a casa. Nin un putu tiru a la portería del Cádiz en tola segunda parte. Hai que xingase. La directiva dimisión escoyonándose, desapaecida, colada. Dá-yla a Barral, que mete gol. 0-3. Herrera avergoñáu, sentáu, alloriáu. Tien de dimitir, porque esto nun ye a igualo.

LA TRABE NOS GÜEYOS. ALBACETE 2-2 SPORTING

Uviéu 3-1 Numancia

Uviéu 3-1 Numancia. L’equipu vecín yá mos algamó. Güei pelo menos y hasta’l Albacete-Sporting tarán percontentos. Ye normal: son un equipín que vien d’abaxo, de bien abaxo, de los patacales de tercera, asina que nun tien de estrañanos qu’un Sporting firíu seya un carambelu de carroña pa ellos, porque nun ye que nos miren de regüeyu, non, hom: nin disimulen y mírennos direuto a los güeyos con un tarrecimientu incontenible polos munchos años d’esmolimientu que nagua y tien de esperar. Valnos más ganar o pelo menos empatar mañana. 

Pol guah.e

Domingu. Sol de fusión frío de payares; domingu qu’ún nun sabe cómo derromper nesi estáu inercial de la física ensin motor, ensin fuercia: si nun t’emburrien nun te mueves. Eso dicíalo’l Santamaría en segundu de BUP, y tamién dicía: “Senén, nun faigas lletres”. Senén nun-y fixo casu y fixo lletres, y equí ta inda escribiéndoles, nuna edá na que dacuando escaez cuántes son nueve por siete. Queda un pitu nel paquete y nun queden perres pa mercar. He fadiame y dir al caxeru por más pa más tabacu, qu’a esti domingu aínda-y queden hores de vixilia y un Albacete-Sporting. Tengo un primu que ye del Uviéu porque los de Tinéu son asina. El so fíu ye la imaxe que veo equí de los fíos n’El Molinón pero n’azul. Sólo por eso allégrome (pero poco, eh) de la so victoria d’ayeri, pol guah.e, non pol mio primu, que yá ye mayor. Güei un empate valnos, por siguir percima l'Uviéu. 

Albacete 2-2 Sporting

Acaba d’empatar el Sporting gracies a qu’Herrera desdíxose y metió a Santos, que metió gol. La alliniación de la primer parte yera pa echase les manes a la tiesta, pa dici-y a Herrera anda, paisanu, vete yá pa casa. Santos, ta pernidio, ye delantreru centro, anque tengan de meter al Scepovic n’otru llau o nun avión. Albacete 1-2 Sporting, que se pon cuartu, fuxendo del Uviéu, que se queda coles ganes. Pero nun fales tovía, nun vaya ser que. Albacete poco ofrez al foriatu: una cai piatonal (pa qué falaríes: Albacete 2-2 Sporting) que sal de la catedral, y cuasi nada más. Polo oyío, el Sporting (vi la primer parte; la segunda, como ye costume de mio a estes hores, aprovéchola pa cenar oyéndola) ye como ye pero con Santos: a ver si rabuñamos l’empate. Sporting octavu. ¿D’esmenu el Sporting escaeció cómo xugar? Non. El Sporting nunca nun xugó un res esta temporada.

PANTASMES

Nun falla: cada vegada que frego un sartén apruz la muerta. Cuando aquella nueche me dixo cómo había que fregalos quién diba a pensar que tan pronto la muyer sedría pantasma apaecida en bañal. Hai una muyer pantasma pal sartén y hai pantasmes, que tampoco nun fallen, de muyeres pa dellos exercicios de ximnasia: la de facer abdominales y la de les estensiones de cuádriceps. Ta tamién la de fregar la cacía que nun ye sartén.

Mui de xemes en cuando pescudar nel pasáu, si se fai bien, sistemáticamente, calteniendo un solu oxetu d'estudiu, pue valir p'algamar l'orixe, la causa del oxetu d'estudiu que xeneralmente ye un problema bien gordu pol que paga la pena l'esfuerzu de talu pescudar. Pero lo normal na xente, no que s'inclúi esta cadarma, ye andoliar peles numberoses caleyes de l'alcordanza al aire qu'a caún-y da ensin sacar un res nin falta que-y fai. Y equí ye qu'entren les pantasmes d'asociación automática. Y una d'elles ye la del curl de bíceps, quiciabes la mayor pantasma de toes, incluyida la muerta.