Nuna terraza al llau la Sucursal, arrodiáu catedrátiques de choniloxía ensin la ESO finada. ¿Díes caberos, por Dios? Un 2% güei de lluna visible, equivalente a la lluna llena nel mundiu les almes en pena. Que nun pase nada. Les chonis tán riendo bastamente con hestories d'educación d'arrabalde.

D'HOMENAX N'HOMENAX

Nun hai como cenar en casa, d'homenax n'homenax. Esta nueche con un Letras Minúsculas de 2016, de La Rioxa alavesa, y tres pates de pulpu. L'home solu bien se llambe y s'escribe. L'home solu dempués, na final del día; dempués de tener aguantao a la xente coles coyonaes de caún na sucursal del arrabalde'l sur. Ye imposible refugar l'homenax, coime. L'home solu sólo dempués, a la cena, agora. L'home solu que llabora pa sí, alloñáu de trámites pagaos p'almes en pena, facebooks y twitters, cola sola compaña animal de doña Lluna alendando por arrinca-y ciegamente un día más de los sos quince años a la muerte perra que Lluna nun conoz.

a+bi (17)

Nel branu'l 91 conocisti a ún que ye la mecedura de fatu y llocu, pa encima atuñáu pa colos demás. El probe tenía munches mancadures. Sólo digo que ye capaz de siguir lleendo a Lobsang Rampa, fontaneru inglés. Foi l'añu nel qu'entrasti a trabayar pal Santu Oficiu. Conocisti al maizón porque fixeres bones migues cola muyer (nun se m'entienda mal). Nel ambiente nuevu aquel, la collacia yera universitaria, y na cayida aquella nel furacu llaboral ayén garrástite al clavu ingrientu d'aquella universidá que, cagonrós, tenía maríu patayón: llocu, fatu y agarráu, más roñosu, babayu y chifláu que Marimar, natural de Llión. Yera la pareya'l casu típicu de la muyer intelixente sometida al poder del burru masculín. Ye, ye, ye; yera, yera, yera...

PSOE + 1/10 DE PODEMOS, NÚMBERU COMPLEXU

¿Qué foi d'aquello de la imaxinación al poder? Pámique clisó en tando dicho y nin esguiló nin un poco pela exa d'ordenaes. Nun sé si vos decatastis de qu'ensin ángulu'l númberu nun tien imaxinación y ta condergáu a arrastrase pela exa d'ascises porque l'ángulu nun ye otra cosa que perspeutiva, que ye lo que nun tien el políticu. Raíz a seques de menos un ye paranoya, sicosis, un coxicar pelos praos de la Lluna. Ún nun ta pola imaxinación como sustantivu solu al poder. Non. Ún ta polos númberos complexos, nos que nel poder hai imaxinación, n'ángulu variable. Un poquiyín d'ángulu valnos, yá ves. Un 1+1/10 i, si te paez. Un PSOE + 1/10 de Podemos. Meyor esti númberu que'l 0 de güei pa payares col peligru de la drecha amiyando.

XUXURÍOS

¿Ta dalguién, nun sé, el diañu pequeñín del réxime'l 78 sentáu nel costazu drechu y amarutáu de barón, xuxuriándo-y al oyíu na oreya a Sánchez que si dexa pa prau de payares d'otres eleiciones la formación de gobiernu, si ye que va d'esa, Podemos va sumise pel furacu'l desamor y el tarrén de la esquierda va quedar pa él solu, reconquistáu? Pel llau qu'a mi me toca abúltame que non. Pero pa la España grande, la del votu cagón que munchos nomen responsable, abúltame que sí, que'l diañu pequeñín nun va al debalu, que Podemos ta glayándo-y al Réxime que lu amate.

VÍA MUERTA

Otra vez en vía muerta, ente lo que tresnes colos güeyos zarraos y lo que nun sabes si vas ser a tresnar. De momentu, nun parpaguiar, pa la rutina l'arrabalde d'almes en pena. Ta'l tiempu anublao, fiel a Xixón, fiel a la edá que nun sabes si baxa en tobogán pa la muerte, cañica nun taramingu o tien tovía cuerda pa sorpreses.

DE LO DE GÜEI

Agora la entruga'l millón: ¿de qué val votar al PSOE o a Podemos? Sacantes quieras lleelo en clave de Maquiavelu. Podemos ye una bona torga nel camín del PSOE, ta visto. El PSOE sabe de sobra que l'español mediu nun ta pola esquierda verdadera. Al español mediu viénen-y al maxín les imaxes de los rellatos del güelu de la guerra sofitaes poles teles del réxime nuesu, que pasen les hores falando d'una estrema esquierda qu'axetivada va calando na xente. Sábelo bien el PSOE, puestu ehí na dómina'l 78 pa torgar al PCE, l'auténticu partíu antifranquista. Un pautu agora con Podemos ye antinatural en clave de réxime porque valdría p'abri-y camín y nun vaiga ser que mos termine comiendo con pataques regaes con Ribera'l Dueru pa toos. ¿Ta Sánchez sacrificándose mandáu por quien punxeron ehí al PSOE? El PSOE pautó fasta col diañu pero enxamás col PCE primero y dempués con IU. Al PSOE nun-y importaría pautar con Ciudadanos de nun tar estos tan refugaos. Pero hai lo qu'hai y España o espeña a Podemos o ta pa entregase en cuellu la drecha fasta que'l PSOE llogre mayoría pa él solu, como nos vieyos tiempos. Nun veo a esti país arreblagando p'alantre, tovía.

TERCER DESTÍN

Esta nueche vas chumate a cuentu otra ufierta de treslláu, esta vegada p'Asuntos Internos, de policía cabrón. El sorrollu inicial de la Vaxina Medrosa deriváu en nun quiero beneficióte como nun teníes pensao y agora vas dir ehí al llau de casa nuna vuelta a los orixes pero entrando pela puerta bona, non la de la sucursal ximielga. Vas siguir tratando con xente pero como putu policía de persones se supón que nun sabes si meyor pero sí más educaes. Amás, si se te ponen farruques pues mandales a tomar per culu, o enseña-yos la placa o'l dentame. Garrástite a esta tercer rabasera (SEDAF, SEFOI, Asuntos Internos) d'aire favoratible porque meyor destín nun sabes ónde y de cai de vida nun ties pensao camudar.

Teo'l presentimientu de que mañana (porque ye mañana, ¿non?) va salir Sánchez presidente, de que too foi un xuegu cucios porque nun puen ser tan necios, etc., etc, nesta ñora borrinosa del quiero nun te pueo dar. Teo'l presentimientu, pero quién sabe.

Pasao mañana vamos ver si l'aburrición foron dos estratexes maquiavéliques o a cencielles ye imposible, p'aliviu los facheríos vertical (PP, Ciudadanos, Vox) y horizontal (JxCAT, ERC, Navarra Suma, Coalición Canaria), armar el gobiernu en teoría más a la esquierda no que va d'hestoria del réxime'l 78.

a+bi (16.2). D'AG

Esta continuación ye de cuando faes el pinín nun garrando les poques oportunidaes que te pon la vida delantre'l focicu porque nun tas p'apreciar que fixere apagar la lluz de la Corrada pa la botella de cava con veles que pidió llantar a escures sobre la mesa, veceros y non veceros mirando pa vós; que l'Aute algamare slowly'l cume de sí. Fuxeres d'AS y de la dulda nel caberu instante en tren a Valladolid pa con AG, amburestis el cascu antiguu y fixístite caca nos pantalones: entrárete'l vértigu a siguir siendo feliz con quien d'aquella yera calcada a ti. Quixisti más volver cola mentira de la ma vicaria, asina que fádiate, por medrosu, por cagón.

FaceApp

Quédense coles cares pa facer nun sé qué conspiranoicu, pero tando acostumaos a lo que con nós fae Google... Hai tiempu que-yos entregamos la intimidá, bien contentos. La mayoría somos una partícula más nun par de miles de millones tirando perbaxo, asina que qué más da, ¿eh, ho?

L'ésitu de la FaceApp creyo yo que ta en que con ella facémonos spoiler, y si hubiere una app na que apaeciéremos na caxa'l muertu diba petalo de tanto que mos diba petar. Somos meticonos hasta con nós mesmos, eso ye humanu y nun tien falta d'igua.

a+bi (16)

Ye l'Aute un bon poeta cantautor de llargu percorríu na to hestoria, asociáu mayormente a les muyeres de pallabres mayores. Paríu al alba por Ada en 1983, foi a morrer en 2001 bailláu (cantar de YouTube) con AG, de Valladolid, doctora del SO, n'amor que nun algamó a ser por culpa d'AS, d'Asturies, profesora del MEC. Homónimes, pudo más la costume'l tiempu, total pa nada. ¿Qué sedrá d'AG? D'entós p'acá la costume frayó en milenta cachos aventándola (l'Aute incluyíu) a ca Dios la necesidá. Nello tas.

2019-2020

Ta la xente ilusionao col tercer llabor de Torrecilla dempués de los dos estropicios anteriores. Ún sigue roceanu, nun se fía, otra temporada más, la 2019-2020, alloñáu d'El Molinón. La camiseta'l Sporting, fea a rabiar, ye un xostru asimétricu a xuegu cola lliga asimétrica. El sindiós pal TOC del fútbol profesional. Amás, la insinia'l Sporting nun se ve, tapecida pola asimetría ancha.

L'Uvieín quier mirase nel espeyu'l Sporting afirmando que yá val de trayer puxarra foriato y que lo qu'hai que facer ye un Uvieín abelardu de guah.es.

Ver veremos.

a+0i (incisu de presente 3)

Ye esta una selmana de rocea por mor de los lladrones de cuerpos, buxa per momentos, estropiada por aciu la bona salú. Aseláu en ti pa pasar la nueche na que vas camín d'otru, gufando, esprecetáu per momentos, aporfies, anecies en fadiar la selmana de vacaciones, tol putu día n'áscuares.

a+0i (incisu de presente 2)

El Sistema Nacional de Salú, ultracuerpu grandón de la Política Correuta, va semando vaines perhí, duérmeste y cuando espiertes yes un non fumador. Tamos arrodiaos d'ellos, acaldía hai más, llexón de muertos vivientes pa diez años más de vida, dixéronte. Déxate llevar, ye pol to bien, aporfiaben en 1978 los fíos de la vaina, l'EPOC nun tien vuelta atrás. A los fíos de la vaina conóceslos porque empiecen a engordar y a ponése-yos la pelleya guapo someyando moñecos, l'alma ausente. Ties llantada la vaina al final del pasadoriu.

a+bi (15.2)

Yeren tovía tiempos de melena, de pelo caltenío pelu a pelu. Trenta y siete años nel futuru lo meyor que pues facer con ello ye tayalo, quitar d'enriba la serda. El Xesucristu aquel Superstar qu'oyía a Víctor Manuel quedó ensin nun recuerdo qué polo que naguaba por caltener la melena un poco más.

a+bi (15.1)

Si llegar lleguen a dicite en 1982 que dientro trenta y siete años vas dir en calzones pela cai caleyando quilómetros por caleyalos escuchando per teléfonu a los Bee Gees gastando datos baxaos d'una ñube alministrada por una empresa que va nomase Vodafone, pon que fore de la que dibeis pal institutu na reuta cabera del COU, más polos Bee Gees que pola ñube dibes entruga-y si almorzare sidre al Xesucristu aquel Superstar qu'oyía a Víctor Manuel.

a+0i (incisu de presente)

Ye vienres. Tas chando'l pitu caberu'l paquete Lucky Strike que mercasti'l llunes. Una manera como otra cualesquier de fadiar les vacaciones. Eso sí, oi, lleves más de sesenta quilómetros caleyaos dende'l sábadu: si se fai bien, fumar muncho menos o non fumar acadarma. L' ultracuerpu ha quedar bien finu.

a+bi (14.3)

El casu ye qu'en 1991 finó xugar a la tanxente pa percorrer puntu per puntu'l camín de pá, que nun queríes pa ti. Por eso ye que ves agora a la mocedá d'agora qu'agora ta algamando la indeterminación de la tanxente y arrepanchigáu na siella'l Santu Oficiu díceste: Probinos, yá se calcarán la hostia.

a+bi (14.2)

Ves a la xuventú de cosenu menguante p'hacia la indeterminación de la tanxente que se creye infinita, xente ciego que nun sabe pola edá que'l puntu d'aunión que ta na circunferencia goniométrica de la vida tien bien garrada a la tanxente pela fañagüeta. Si nun entiendes un res, tu déxate llevar pol soníu, ¿sabes qué te digo?

a+bi (14.1)
Tg a = sen a / cos a.

En 1991 deprendisti que la vida ye trigonometría, que pa que'l senu espoxigue'l cosenu tien d'amenorgar y que la tanxente ye la proyeición d'ambos nel cine la mocedá, onde tán poniendo una película na que'l cosenu nun crez porque eso ta fuera'l guión.

-Mio fíu salió pela tanxente, ne.
-Tu tranquila, yá crecerá'l cosenu.

a+bi (13)

En 1987 nel puertu de Rostock encañonáronvos a ti y al bichu: trevesareis la llinia seguridá y yá tabeis pasiando per onde los barcos grises de guerra. P'aformigar al cafiante animal llevabes bebío qué sé yo y lo mesmo te daben barcos grises de guerra que'l Pérgamon, de Berlín. Les bicis frenaben pedaliando p'atrás y yera costume qu'homes y muyeres en porrica se ducharen xuntos en bona y gayaspera compaña: ¿quién nun ta pa ver con ventipocos años?

a+bi (12)

L'animal surdíu de la fin de xuegu cobróse en 1986 la primer fema a cambéu d'un felpeyu nesi segmentu perllargu pa lo que val la vida humana nel que-y damos más valor a lo foriato qu'a lo de casa. Foi'l primer pufu d'afeutu (el segundu diba ser la Vaxina Medrosa), la primer lleición pal fatu que cuasi tolos homes llevamos dientro: buscábemos, con otra muyer, matar al bichu.

a+bi (11)

Y nun hebo nada que facer. En 1984 Ada tiróse a la carretera non Kerouac on the road sinón pa que l'atropellare un coche, plasmada con bichu talu. Nel sobacu drechu de mio, "De la mano del aire".

a+bi (10)

Quies siguir allargando'l xuegu, siguir siendo'l putu amu de ti lo mesmo que nes hestories que tovía te cuntes enantes dormir. Sólo que n'aquella caleya pegaba un sol qu'espatarraba y pa dormir quedaben hores y hores de bichu aporfiante, yá más paecíu a tabán qu'a Demogorgon.

a+bi (9)

Camín de los cero graos de la muerte, nel ochenta y tres españó, a la vera Ada, la segunda realidá, arrequexada fasta entós nel xuegu. Quier dicir qu'en 1983 la segunda realidá abrió la bocona de pétalos carnívoros como'l bichu de Stranger Things. En vez de salir pitando espavorida, la Cadarma enfrentóse al animal desarmada.

-Estás como la pija de un mono, Senén.
-¿Por qué, hom?
-Literaturatemáticas y encima en bable.

Buenas noches.

-Bones nueches, don Fernando.

a+bi (8)

2+10i=10,20 sub 78,46°. L'ángulu pa percorrer fasta'l 0° de realidá someyaba'l futuru nes nueses manes. 3° de BUP y COU foron los meyores años. Dempués l'ángulu diría zarrándose plizcando, mordiendo, tayando n'arcu amenorgante.

a+bi (7)

Al entamu l'ataque realidá tuvo muncho más de xuegu, yera'l númberu complexu 2+10i, 78,46 graos bien próximos tovía a los 90 d'imaxinación plena.

a+bi (6)

Armaos de Triana y Bloque (esti caberu más pasáu yá que'l gregorianu -ónde va parar-) y pronto de Pink Floyd, creyimos tar preparaos pa la segunda realidá pela ponte de Supertramp dempués d'un bon almuerzu n'América.

a+bi (5)

Entamare a emburriar el segundu tiempu de realidá y por tar refrescando con una moza de Tinéu en Tinéu nes fiestes de San Roque nun quixi trabayar d'aparcacoches nel prau vecín, asina que tuve de conformame cola grabación como se facía d'aquella: axuntando aparatos altavoz escontra altavoz y silenciu, nin, nun vaigas a fadiámela. Güei la moza ye maestra en Tinéu y nós yá nun grabamos, pa qué tando Spotify.

a+bi (4)

Poco enantes del segundu atropellu de realidá, ¿quién nun se punxo testerón colos pas pa que-y mercaren una cazadora d'imitación de cueru negro?

a+bi (3)

Sabíemos de memoria'l llistáu aquel pa empollones de litiu, sodiu, potasiu, rubidiu, cesiu, franciu, beriliu, magnesiu, estronciu, calciu, bariu, radiu y cinc y la prima Margarita poníanos zúcare nel sangre.

a+bi (2)


Yeren los tiempos anteriores a la segunda fola de realidá.

a+bi (1)

Dempués de los cincuenta nun sé vustedes quien los tengan pero esti ñacíu nos sesenta ta diendo a vivir pa la raíz de menos un en romántica fuxida de la roma realidá de cincuentón fracasáu p'hacia la prehistoria de los cuatro años, enantes que l'Estáu entamare a amesta-y númberu real na Edá Antigua.

DEPÓSITU ENLLENU

La cosa ta en dir alloñándose de la realidá d'esti país. El sábadu tuvi un tiempu de flaqueza naguando pola compaña humana pero güei yá tamos nesi dir melgueru p'hacia'l mundiu'l revés de los númberos cola lliteratura como migayes de pan pa nun perdeme nel camín de fuxida de cola xente y d'una España que nun presta gota con un futuru solombriegu. El sábadu tuvi señardosu pero agora teo gasolina pa un cachu.

ARGAYU BINARIU QUE NUN DEXA PASAR LES SEMEYES

Facebook, WhatsApp ya Instagram, del mesmu, sumen cinco mil millones d'usuarios. Dos mil quinientos cuarenta y cinco millones de la población total, ocupaos en tener qué comer mañana y dalgún qu'habrá perhí negáu o que se niega, nun s'enteren de que per tercer vegada en cuatro meses a esos tres canales trevesóse-yos un argayu.

EL MUNDIU DE FOLGANCIA NA SUCURSAL

Los físicos estremos Pitágoras y Max Tegmark afirmen que lo que nós creyemos realidá nun ye más que la proyeición de la matemática. L'universu nun ye que seya matemáticu, que tamién, sinón la matemática mesma. Senén, na cueva Platón, nun sabe que ye un algoritmu que conduz l'algoritmu más cenciellu de la Vespa PX150. En "Folgancia na Sucursal" cachos d'esti cosmos (l'auténticu) salen como sal en "Stranger Things" el mundiu'l revés.