CORRUPCIÓN VAXINAL NEL SANTU OFICIU (16 Y FINAL)

Nun fai falta ser Jung pa decatase de que l’entornu los suaños ye l’estáu del alma. Taba ocurriendo que dexo cocer los dilemes perimportantes ensin da-yos vueltes racionales y qu’ayeri pela tarde yá taba yo un poco revueltu. Cuando me metí en cama yá sabía que diba haber movida nocherniega. Como una cafetería de los años setenta nes soles manes de la entropía dende la so inauguración, madera gastao, escuridá, goler nun recuerdo tener golío nada pero golería a rancio, asina yera la sede principal del Santu Oficiu. Esperté conociendo la decisión.

-Don Fernando, coge el teléfono donde la otra vez, que te paso con la MLT.

Don Fernando tenía primero que tenela llamao dende’l vienres (desplíca-y tú a la MLT que nun la llamares porque tabes pendiente de que llegara’l sueñu nerviosu y tres él el suañu esclarador) y segundo tar aconceyáu con ella nesi momentu na Sede Principal.

-Hola, soy ML.
-Hola, ML.
-No te dio Alberto Fernández Nuevo mi número de teléfono?
-Me lo dio.
-Ah.
-...
-Bueno, entonces te habrá dicho que tienes sitio en el SEFOI.
-Me lo dijo, sí.
-Y qué te parece?
-Muy goloso pero no.
-No???
-No.
-Pues entonces nada.
-Entonces nada.

Espidía de xelu de la MLT. Aliendu fondo el de mio. Aliendu de yá diba siendo hora de que finare esta hestoria de corrupción vaxinal nel Santu Oficiu.

NOTES POSELEUTORALES DE LA ESPAÑA VERTEBRADA

1. Celebramos que'l PP tea frañíu en dos. Y que dure munchos años. Gracies, señor Abascal.

2. Ye una nueche coyonuda pa escuchar esRadio. Tán quexándose de la llei d'Hondt. La guinda del Losantos: "Perdieron toos: perdió España".

3. Y agora'l gobiernu yá nun va ser "illexítimu", verdá?

4. Una vegada más demostróse que l'español vota con xacíu.

5. Fernando Sánchez Dragó ye una pantasma.

CINÉTICA'L VOTU

Yá fiximos l'oveya, yá depositemos el votu na urna, los votos nes urnes, l'amarronáu Senáu, el blancu oveya pal Congresu. Fáennos creyer que n'exerciciu democráticu universal tamos escoyendo a los servidores del pueblu español y lo que realmente tamos faciendo ye escoyer a los moñecos bien pagaos que sirven a los que tienen más perres. Filera soberanos nacionales delantre la mio mesa eleutural. El paisanu del centru la mesa grita nome, apellíos y númberu más lletra del Documentu Nacional d'Identidá del votante de soberanía compartida. El que ta a la esquierda del paisanu busca nun llistáu los datos gritaos pa marcalos con fosforescencia llimón. El de la drecha ye'l machaca que ta faciendo callu nel deu corazón manuscribiendo los dichos datos gritaos. Devuélvente'l DNI, quiten de les ranures los sobres vacios que les tapen, metes per elles los sobres soberanos pa dientro les urnes, bonos díes y sales del colexu eleutoral con cara fatu satisfechu pol drechu cumplíu.

SOCIALDEMOCRACIA VS DRECHA LLIBERAL

Toos diendo a abellugase a la cama a los sos deleres: llibru en reflexón, radio o tele o smartphone o USB o CPU en reflexón, polvu pa los amantes de los otros o paya pa los amantes de sí mesmos pero güei polvu o paya en reflexón; pa la cama direutos (direutes los de Xuníes Podemos) a dormir con pastilles o hestories que se cuenten, en reflexón. La hestoria d'esta nueche va ser l'aburrición, vamos ver: l'impuestu indireutu de la drecha lliberal ye que'l ricu paga lo mesmo pol yogur que'l probe pero llueu'l ricu con cáncer pue dir a Houston y el probe, cola sanidá pública d'equí fecha una llaceria por aciu la drecha lliberal, non. Hasta mañana.

REFLEXÓN

Ta la xente reflexonando a tou tren nel Lidl y les cafeteríes. Pa que reflexonemos más nidio, sal el sol.

Enumeramos.

Hai xente con un arcu de votu devotu pa un llau o pal otru del xuramentu del xuegu de pelota; hailo inclusive qu'arranca dende'l centru, esi llugar menos hestóricu; hailo, en fin, enfotao na mesma diana dende la primer votación biográfica. Ye la xente con ideoloxía. Pa los otros, la xente de la indecisión o la medrana o les dos a la vez, tán los debates de la tele y tán les redes sociales, ñeru de la mentira al serviciu l'enfocicamientu y el mieu. Saben na tele y nes redes sociales que l'indecisu y el medrosu o l'home colos dos axetivos copulaos nun va contrastar la mentira cola fonte orixinal, la de la verdá.

Siguimos.

Tán tamién quien afirmen (y nun son bocayones de votu avergoñáu y nun van a votar, oi), non faltos de razón (miraos dende arribones, como mira un paisanu una filera formigues), que tolos políticos son iguales y que va aportar a les urnes la madre del que pide'l votu. Y tán los exóticos que voten en blanco, rama de los anteriores concienciada nos deberes ciudadanos.

CORRUPCIÓN VAXINAL NEL SANTU OFICIU (15)

Asina que mos somorguiamos en tintu, que mañana sedrá sábadu si Dios quier. Hai que pensalo en fríu, ver si convién camudar les probes almes del pueblu por un horariu menos afayadizu, lo conocío polo que nun se sabe, si paga la pena romper la inercia a la nuesa edá. El SEDAF yera golosiu, siempres mos llamare l'atención. Un destín que mos tán ufiertando agora ye'l del SEFOI (Serviciu Formación del Inquisidor), que debe ser bon trabayu fechu ún a él. Ye llugar solu, creyemos, lo cualo, al entamu, tien les sos coyonaes d'aprendimientu pero, a la final, suel ser el paraísu la iniciativa propia. Ye lo que tien la Santa Sede Principal que nun tienen les sucursales: que si te toca xintar mierda xíntesla pa nun cenar en casa pero si te toquen llambiotaes esfrútesles nun queriendo tar n'otru llau xintando'l piensu la sucursal.

Ú VOX?

Falando güei con dellos collacios l'arrabalde'l sur, lleguemos a la conclusión de que dellos barrios de Xixón güelen-yos mal a los de Vox: d'esa pastia deben tar fechos. Vox va rabuñar votos a baruyu ente la clas baxa, pero sabe que non ente la clas baxa urbana. Vox, como siempre tien pasao cola drecha, va apañalos ente la clas baxa'l campu, l'aldega. De fechu, va facese cola mayoría los votos nes aldegues, dende la mano'l cacique fasta la del que tien dos vaques o mediu gochu. Les aldegues de Castiella deben tar bien regaes de papeletes de Vox. Na hestoria mínima y familiar de Castiella tien munchu pesu la hestoria d'oyíes del imperiu español, pámique. Nel nuesu barriu pa mi que non.

CORRUPCIÓN VAXINAL NEL SANTU OFICIU (14)

Ablucamientu, indignación, comedia son les tres fases d'esta corrupción vaxinal nel Santu Oficiu. La Vaxina Medrosa yá pa prau. Resulta qu'agora tán lloviéndomos los abellugos (valga la paradoxa) na Sede Principal, pero nun mos fiamos; amás esta corrupción vaxinal nel Santu Oficiu tien sío demasiáu monte rusu: el cuerpu nun llau, la tiesta n'otru; el regresu la tiesta au'l cuerpu; mandar otra vegada la tiesta p'allá... Non, home, non; nun fadie usté. Esti llunes que vien, nel que los partíos políticos van saber yá con quién van casase o facer tríos, tendría d'aconceyame con la MLT pa escuchar les ufiertes y los motivos de tener obrao tan irresponsablemente. Ta pasando, sicasí, que'l ciclu ta na comedia, alloñaos l'ablucamientu y la indignación, y que toi entamando a entender a la MLT, que tanto me tenía encabronáu. Nun hai nada como la risa, fía de l'abonda distancia.

LA PAPELETA VOX?

Yo nun sé a don Cos, pero a esti llau del barriu que fuere arrabalde cuantayá, el güei Llavapiés multicultural de Xixón, la propaganda de Vox nun llegó tovía. Sedrá que nun tienen perres pa marafundiales en llugar perdíu y déxenles pa zones más afayadices, qué sé yo, Somió, Ávila o Quintana de Raneros? Toi imaxinándola propaganda en vox verde cola banderona d'España y l'Abascal califal como un Neoanguita. Llástima: prestaba alcontrar nel buzón un sobre tan esóticu y castizu, miralu un ratu, alloriar y guardalu pa la hestoria de la anéudota o del entamu en democracia agonizante de los fasci di combattimento, el Nationalsozialistische Deutsche Arbeiter Partei, la Falange Castiza o'l partíu'l comandante'l cuentu la criada.

CORRUPCIÓN VAXINAL NEL SANTU OFICIU (13)

Vino a dici-y a Albertu la MLT que tuvo ente la espada y la parede, que la Vaxina -vamos apellidala definitivamente Medrosa- torgónos por pasiva diciéndo-y a la MLT que si díbemos nós ella colaba, y que d'ellí sacare l'axetivu "grave" porque, coimes, sólo daqué que ye grave fai comportase d'esa manera a una persona, sacantes esa persona tea como una teya o nun madurare, diz Albertu que-y retrucó a la MLT, que nun sabía qué tenía pasao ente la Vaxina Medrosa y nós, de quien (nós) guardaba un bon recuerdu pol que'l fadiu yera mayor, que poro taba como una lloca buscando sitiu semeyante pa nós na Sede Principal, que si tuviéremos énte un treslláu oficial la Vaxina si nun taba conforme tendría de dise pero que nesti escuru movimientu hai qu'entender que la Vaxina ta asitiada y deprendida y que dos persones nueves diben ser munches persones nueves nun serviciu que, como ta, ta furrulando como una máquina de precisión, ye lo que-y vino a dicir a Albertu la MLT, que quier falar en persona con nós pa danos esplicaciones por respetu a la persona fadiada.

MÁS A LA DRECHA NUN PUEO TAR

Dir a lo del 28A ye como pegase un calumbón n'agua frío. Garramos fuelgu, nun lo pensamos más y, atapándonos la ñariz, tirámonos al ríu del colexu eleutural. Cuando votemos, siempre lo fiximos mirando pa la esquierda dende posiciones variaes pero fuxendo de la drecha. PSOE, PCE puru y delles separaciones y les dos fases evolutives suyes, siempre dende'l PCE: Esquierda Xunida y Xuníos Podemos (agora que tán xuníes, yá non; non por nada sinón porque les fataes, y más les llingüístiques, a la nuesa edá y col nuesu enclín, tóquenmos muncho los coyones). Ta claro que nun vamos votar a Vox: pa nós que nun tenemos el percorríu del Dragó nin, a la inversa, el del Vestrinxe. PP ye la corrupción xeneralizada, drecha aparte. C's nun ye nada, drecha aparte. Xuníes Podemos ta bien como la escudera que-y tira del brazu pa la esquierda al caballeru del PSOE. Ye sólo cosa d'atapase la ñariz y mete-y a la urna la papeleta que vien nel sobre la semeya.

Güei llegó a los buzones del barriu Actúa, que ye esquierda dixebrada, esto ye, nada nuevo baxo'l sol. El PCE mordió l'anzuelu los Pautos de la Moncloa creyéndose tiburón con cinco fileres nel dentame y resultó bocarte. Los Pautos de la Moncloa taben fechos pa la socialdemocracia de Felipe González: dempués yá se vería. El PCE desapaeció n'Esquierda Xunida y Esquierda Xunida desapaeció en Xuníos Podemos, qu'agora tán xuníes. Y del PCE aquel, yá descafeináu de toes toes, surde nestos díes atropellaos la cosa esa xerontocrática d'Actúa, a mou de Jurasic Park. Que pase'l siguiente.

CORRUPCIÓN VAXINAL NEL SANTU OFICIU (12)

Los traumes que-y tengan quedao a la Vaxina Rancorosa, o Medrosa, impórtente un rábanu. Lo que quies saber ye qué comedies trayen ente manes na Sede Principal. Ufiértente un destín, acéuteslu, dícente que val, que ta fecho, qu'entames el 6 de mayu, anules les vacaciones pidíes na sucursal del sur, la rapaza que vien de la Sede Principal tien yá concedíes les suyes nel llugar que vas dexar atrás, estudiesti los entamos normativos de los autos de fe, llámate la MLT y dizte qu'u dixeron digo dixeren Diegu. Ye, en definitiva, la MLT la que te tien podre, encabronáu, non la probe Vaxina Rancorosa Medrosa dolce años dempués. Lo que quies ye saber qué hosties se dixo de ti y que llueu la MLT te pida disculpes, porque a esa casa putes va dir a trabayar so puta madre.

CORRUPCIÓN VAXINAL NEL SANTU OFICIU (11)

L'esperimentu morrió en xineru de 2007. La Vaxina Rancorosa escribióme que paecía que yo tenía razón, que yá taba entamando a arrepentise de tenelo dexao, que quiciabes podíemos siguir siendo los amigos que fóremos, qu'ella qué sabía, etcétera. Intentémoslo una nueche y vi perclaro que non, qu'ella siguía nomándome "cari" n'axetivu de fatos pa un fatu buscando amás foder con otru y que volver pa enantes de payares de 2006 yera imposible ente tantes coses porque enxamás enantes de payares de 2006 me nomara "cari", esi axetivu apocopáu de fatos pa un fatu; qu'eso nun diba furrular nin col Apolu 11 y que más bien diba ser l'Apolu 1. Adiós, ne.

Un añu dempués, en xineru de 2008, alcontrámonos pela cai y quixo parame pero yo nun me dexé parar.

-Ahora tienes perro?
-Perra. Adiós.

A unos venti metros llamóme.

-Oye!
-Dime.
-Qué hago con ropa y libros tuyos que quedaron en mi casa? Te los envío a la Sucursal?
-Mejor tírala al contenedor más cercano. Con los libros haz lo que quieras. Adiós.

Fasta'l miércoles pasáu. Yes incompatible col equipu'l SEDAF.

CORRUPCIÓN VAXINAL NEL SANTU OFICIU (10)

A estos cuatro, que son collacios, voi pone-yos el nome real, per orde alfabéticu: Ánxeles, Belén, Puri y Salva. Voi bebelo (vid. semeya) pa que vivan mil años con bona salú.

-Coimes, don Fernando, asina sí que presta qu'a ún-y faigan la cama.
-Ye ablucante, Senén, lo que me tán arropando nel arrabalde'l sur. Nun lo esperaba.
-Sedrá que nun yes mala xente, don Fernando.
-Sedrá, Senén; sedrá.
-Ye de contraste la coña: siendo'l mesmu, unos tarrécenlu a ún, otros apíñense en favor d'él.
-Bono... Nel arrabalde'l sur nun hebo anzuelos homicides.
-Va ser eso, sí, hom.
-Qué sé yo, Senén. Medrana?, venganza? En denguna de les dos posibilidaes nun soi a ver por qué. Qué coyones-y fixi yo a esa muyer?

CORRUPCIÓN VAXINAL NEL SANTU OFICIU (9)

Yo creo qu'esta vegada'l santu arrepintiérese de lo que tenía fecho y qu'al tercer día púnxome delantre los güeyos la primer señal de que s'enquivocara, señardosu de tiempos meyores. Piedra, que trabayaba p'asuntos de la mar y al que-y prestaba facer cocina, dexáranos el barcu que tenía atracáu nel Muelle y la mesa puesta pa la cena: Si quieres hacerlo bien, no se me ocurre escenario mejor; hoy por ti, mañana por mí. Coño, gracias, Piedra. Cenamos de baberu la cocina Piedra, bebimos de baberu'l vinu Piedra; cañicándonos selemente babor estribor, estribor babor; sorriendo, mirándonos, falando, esperando... La ropa foi cayendo, yá tamos en popa en cama, Dios, qué guapa, esclamaba la Vaxina falófila qu'a rau restalláu metióse la filia au correspuende, nel vaivén de la nueche la mar... Fasta que sentí un glayíu, hosties!, ye pa tanto? Yá? Qué muyer la Vaxina! Joder, acabo de clavarme un puto anzuelo en el antebrazo!!! Llevántalu. Efeutivamente, tenía colgáu nél un cachu anzuelu antisexual que metía medrana por cómo-y tenía afuracao'l pelleyu llantáu pela base la u a la carne esnudo de la muyer en porriques y fin del episodiu.

CORRUPCIÓN VAXINAL NEL SANTU OFICIU (8)

Y poco más hai que narrar: un viaxe pel norte Portugal nel qu'ella punxo la gasolina y yo tolo demás; una tarde en qu'ella vio a la so hermana, paró'l coche, baxó d'él, llamóla, foi a falar con ella y nin me la presentó; el penúltimu día, en que me dixo que quería xubilase al mio llau faciendo calceta; l'últimu día, cuando me dixo que valía más dexalo porque diba acabar poniéndome los cuernos porque yo nun yera quien a sigui-y el baille. Ella fixo y esfixo con esti pinín que yá tenía fecho'l pinín na primer deceición de la biografía, setiembre, ochobre, payares de 1986.

CORRUPCIÓN VAXINAL NEL SANTU OFICIU (7)

Como lo que realmente ye: un felpeyu. En tres meses nun fui a ve-y un solu rasgu positivu, lo cualo la convierte na segunda muyer deceicionante na cronoloxía del eros personal. Mísere, el 6 de xineru de 2007 apaeció con una cáusula de les que saquen l'aire a les botelles de vinu mediaes y un ceniceru y soltó llárimes y pallabres de vergoña cuando-y di'l mio regalu arrogante: d'esa castra yera ella. Elemental na cama, amenorgábala a la obsesión de la pirula y si baxabes el celebru con tolos sos complementos circunstanciales pal arcu l'orixe d'ella ella cuspíate que nun yera lesbiana: pitu más pitu, pitu nos ascensores, pitu a ciento cincuenta pela autopista soltando del volante la mano obsesiva, pitu en más llugares que val más callar; acabé del pitu hasta los coyones, que tán embaxo. L'amor, n'ella, surdía de la metilendioximetanfetamina y la coca con música deep house. Esto ye lo que tienen metío nel SEDAF, que ta mui bien porque la vida privada ye la vida privada sacantes esi celebru averiáu tea faciendo por que yo nun vaiga p'allá y quién sabe qué tendrá cuntao de la mio vida privada pa que me tean alegando coses mui "graves" de la mio vida privada asocedíes nel pasáu.

CORRUPCIÓN VAXINAL NEL SANTU OFICIU (6)

Vamos tomar impulsu coles ales de la imaxinación y esnalar pa ver dende arribones en perspeutiva'l tiempu y decatanos de que l'asuntu tien años, venticinco pa ser exautos. Yo escribí les hestories de Flik y Flok y ella esfrutaba cola compaña documental, asina que too perfeuto. Agora, amiyando, vamos tornar a la posición de sentaos a la mesa, les ales recoyíes, dos muyeres, una d'elles con un brillu nos güeyos que nun producen l'alcohol nin les ganes de foder sinón delles sustancies qu'entren per dellos furacos pelos qu'alienda y s'alimenta l'espíritu racional. Eso dedúzcolo agora que sé más coses de la Vaxina Rancorosa, nun toi pasando per campanes a muertu y toi viéndola como lo que realmente ye.

CORRUPCIÓN VAXINAL NEL SANTU OFICIU (5)

Garremos los cuatro camín del Yovas, Ipicu, Piedra, Antúnez el biólogu y esti que diba de baxón. El Yovas como siempres, escuru y coloráu na escuridá la nueche mariella de Xixón. Unes voldamines en sustantivu d'un Chala'l futuru. Tábemos a lo nueso cuando de sutrucu surden de la barra dos muyeres qu'enfilen bien gayasperes pa escontra nós. A una d'elles conociérala en 1994 nos Archivos de la sede principal y con una tercer rapaza dedicáremonos a axuntar, coldu con coldu y munches hores estres, los datos de los procedimientos del Santu Tribunal nun solu programa informáticu centralizáu. Cayímonos perbién y yo escribí en casa les hestories de Flik y Flok, qu'a la mio muyer nun-y fixeron muncha gracia.

CORRUPCIÓN VAXINAL NEL SANTU OFICIU (4)

Güei tendría de tar sele esperando'l pasu sele del tiempu sele fasta'l 6 de mayu en vez de tar echando pitu tres pitu a puntu de finar el paquete obsesivu por aciu la sicópata, pero pa entender o pelo menos camentar y pa xustificar l'usu del sustantivu acuñáu hai qu'esguilase cuerda'l tiempu abaxo zarrando otra vegada un poquiyín los güeyos p'atopar meyor y metenos en payares de 2006, cuando recién sintiere tocar a muertu les campanes de la Eximia, saliera del trabayu, pidiera al santu desclavar el clavu con otru clavu, metiérame na Tabierna Maraviosa, bebiere unes voldamines (chisgu al Chala), saliera d'ellí con tres collacios (Ipicu, Piedra y el biólogu) que salíen con otres tantes voldamines dientro qu'a min me dieren de baxón. Venga, ho, anímate a ir con nosotros al Yovas, lo cualo venía a dicir que yá si eso llueu tenía tiempu pa surniar los mocos cola almuhada.

CORRUPCIÓN VAXINAL NEL SANTU OFICIU (3)

-No puedes incorporarte al SEDAF.
-...
-Me escuchas?
-Te oigo y te escucho -MLT nun ye Cervantes-. No puedo incorporarme al SEDAF.
-Sí. Eso.
-...
-Hay una persona allí que, por asuntos graves ocurridos en el pasado, es incompatible contigo en el equipo.

Tán grabándolo, esto tien de ser una chancia la radio, toi suañando, plízcome, toi metíu nuna velea, toi trabayando pa Embutíos Peláez SL, nin n'El Corte Inglés pasen estes coses, nun pue ser, toi suañando, ye una puta velea.

-Cómo? -agora ye ella la que calla-. Creo que tengo todo el derecho a saber quién o al menos qué, no te parece?
-No puedo decírtelo.

Definitivamente toi nuna velea, esto nun ye real, toi n'Embutíos Peláez SL, la mátrix de la mátrix, enquivoquéme de pastilla.

CORRUPCIÓN VAXINAL NEL SANTU OFICIU (2)

Tolos grupos profesionales de les dos sucursales del arrabalde'l sur y les tres seiciones de la que ta abierta les venticuatro hores teníen preparao una despidida como nunca se viere, diz; eso quier dicir qu'equí nun queremos que marches. Aprovechemos que nun tas metíu nel grupu del WhatsApp. Va zarrando agora ún los güeyos y torna pela trabe'l tiempu a les trelce trenta d'ayeri, don Fernando, ponte al teléfono, que te paso con MLT, que quiere hablar contigo, cuál cojo?, el del fondo. Yá diba siendo hora, la Selmana Santa echándose encima y el 6 de mayu a la vuelta la fueya'l calendariu. Hola, soy MLT. Hola, ML. Tengo que darte una mala noticia. Eso suéname. Ye la primer noticia mala que me da la muyer que monta n'escoba? Lo mesmo'l tiempu ta puestu darréu lentu y llentu nesa mecedura de les velees que salen nes películes anque siga viendo les coses d'alredor con tolos colores, más borrinosos porque tamos yá mirando pa dientro. Ye la primer noticia mala que me da esta muyer déjà vú? Nun digo nada. Toi forciando qu'ella siga falando tolos complementos vinientes de la mala noticia de trámite.

CORRUPCIÓN VAXINAL NEL SANTU OFICIU (1)

Dalguna vez tomaron a dalgún d'ustedes pol pitu'l serenu? A quien escribe, güei, a la una y media la tarde, sí. Cómo voi cuntalo, narralo, describilo ensin facer referencia al imperiu la vaxina y l'apocalipsis del pene ensin partime de risa pa nun cagar en Dios, que, dicho seya de pasu, nun tien la culpa de tal esmadre? Pos nun lo sé tovía pero nello toi.

23 D'ABRIL

La democracia lo que tien ye que ye pa toos, bobu, y si hai perhí xente enarbolao enarboliando banderes d’España a favor d’un partíu con unes espeutatives d’apañar votos a cuentu risa nun pues dir pidiendo per Twitter un boicó a la Sesta nin amarutar al Ferreras d’Arias Navarro por muncha medrana que-yos tengas a los de Vox, a nun ser que seyas miembru de númberu o disimuláu de la secta (non la Sesta sinón tu nuna d’elles) de la esquierda non demócrata o lo tuyo tea nes barricaes y la dinamita minero: ehí yá nun digo nada, bobu; bono, sí, voi dicite una cosa, nin: nun m’abulta que tengas fechu tu’l pelleyu d’ochobre del 34, fíu como yes de la Constitución del 78 nes barricaes de Twitter y con dinamita de códigu binariu.

GRAMÁTICA Y FURACOS NEGROS

Trancaos en casa, que ye como meyor tamos dempués de siete hores de tratar con xente y xentecaya, que nel SO nun hai drechu d’almisión, escucamos el focicu pal mundiu esterior pela radio, pel Facebook, pel Twitter (deducío ta que nun tamos pa un calumbón de realidá xelada); ye asina qu’atopamos cola semeya l’horizonte socesos del furacu negru que ta nel centru la galaxa M87, esa imaxe que tou dios yá vio y que paez una boca colos llabios fruncíos xiblando queremos comer, comer, comer. Como cualquier escusa ye bona, celebramos talu asocedíu garrándonos a la teta d’un Beronia reserva 2013 regalu del collaciu Castiellu por aquello de tar ún amburando a base bien los díes caberos nel arrabalde’l sur. Hai otres munches noticies tremaes; ye por ello que metemos de secute pa dientro’l focicu medrosu, nun vaiga ser que mos caya enriba por exemplu la escomanada equis cola qu’unos quieren camudar el castellán nuna ecuación de xéneru incógnitu, o que los otros mos escuerran a quixotaes non lleíes a quien mal o bien, meyor o peor, tamos escribiendo esto n’asturianu. Falando de campaña eleutoral, na escoyeta d’esquierda y drecha polítiques ta claro que tiramos pa la gramática; y pa los furacos negros.

XUNÍES PODEMOS VS TERMINÁTOR PELAYU

Vox ta faciendo hestoria pa xentecaya pollino. Paez mentira que l'escritor de Gárgoris y Habidis tea cayendo de la España máxica pa la España cómica. Qué pena, coimes. Podemos, que surdió del descontentu'l pueblu, paeció que quiciabes diba ser a llimpiar España de foyarasca rancio y lo qu'acabó faciendo foi nomase Xuníes Podemos convirtiendo de pasu lo que quedaba de PCE nun dibuxu desfiguráu y ridículu de gramática populista pa dalgunes muyeres. A Vox ta pasándo-y lo mesmo: surdíu de la fartura de socialdemocracia contaminada de babayaes y poro dexenerada en debilidá, ta cayendo n"aventures de Capitán Truenu. Tán faciendo Vox y Podemos buenu al PPSOE y coyonudos los tiempos de la Transición.

TIEMPU INSTANTE

Dizque u escribe “muyeres” otros escriban “homes” y toos tan contentos; que les muyeres menores crucien, en númberu variable como quier el destín, con nós pa peganos el primer besu de guah.e que va pa home o la cabera mamada d’home que va pa guah.e; que poco más se pue dicir d’elles, de les muyeres menores: qu’enllenaron de fluxu los tiempos que nun dieron pa cosa meyor y que güei hailes escaecíes a nun ser que forciemos la memoria pa ratos como esti, diz, y que les hai que mancaron la dicha memoria creyendo ella qu’elles diben pa mayores, les que foron la Divina Comedia o’l Quixote de les muyeres d’ún. Pero que lo importante agora ye’l chuletón de vaca, ye’l Luzón y ye’l Sporting, que-y metió’l primeru al Tenerife. Ta diendo bien la nueche. Va morrer, y qué-y vamos facer, esto que namái ye instante porque equí cuerre’l tiempu porque esti llugar nun ye’l paraísu sinón Xixón a les ventiún cuarenta y nueve, jazz modulando lo que te digo, diz, el so dentame trabayando a estayu pa poder pasar la carne roxo gargüelu p’abaxo. Chuletón sangrín qu’inevitablemente-y recuerda a Cifra faciendo negocios con Merovinxu, agarráu’l que me ta falando a una copa tintu que nun sedrá’l de Mátrix porque esti llugar ye Xixón a les ventiún cincuenta y nueve pero val por él. Xose Albertu ta siendo’l Simeone’l Piles. Esto, nin, va morrer y ye una pena.

TIEMPU MUERTU

Un tiempu muertu que sicasí cuerre y mata, a diferencia de la eternidá de lo que nun ye o de lo que ye dende los homes vivos el tiempu los homes muertos. Pue dase que muerras en 2024 y a ti va date lo mesmo lo que-y quede de tiempu al universu y al siguiente si d'esti, yá puntín infinitesimal d'enerxía, surde otru y otru más, asina fasta cuntar un númberu d'universos socesivos que nun quepa en toles biblioteques de llibros de papel del mundiu enteru. Pa ti, que morristi'l cuatro d'avientu de 2024 a les tres y venticuatro de nueche d'un infartu celebral pol munchu tabacu -dixeron- que metisti pa delles coraes esenciales p'alendar la vida, va ser un ceguñar morrer y espertar al mundiu en Xixón un dieciocho de xunetu del añu 1956 a les diez y cincuenta y seis de la mañana -suénate? Qué coño va sonate!- na dómina de Franco. Tu que nun tuvisti nesi tiempu muertu que sicasí cuerre y poro mata porque yá morrieres y nun tabes nin yeres o fuisti pocu tiempu dende los homes vivos que supieren de ti.

TIEMPU SUMICIU

Nun vos pasó nunca que yá nun tais onde tais? Que'l llugar que tais ocupando ye un sumiciu que vos escuende'l tiempu, que fai que l'espaciu arreviente y s'esparda nel aire vacio como una burbuya d'agua y xabón? Eses hores, esos díes en que'l tabacu, si fumáis, cai too siguío ensin paravos a pensar no dañible pa los muérganos? Nun vos pasó nunca? Bienventuraos vosotros, que vivís na eternidá.

A TOMAR PEL CULU, HOM

Salió. El 6 de mayu entamamos una vida nueva, nun sabemos si meyor pero mui mal teníen que dase les coses pa dir a peor. La xente va selo d'otra manera, que ye la interna. Xente interno y documentos. Que s'amarre otru cola población y les sos zunes. Tornamos, pel llau xeográficu, a los noventa, a cuando fiximos trenta años. Paecemos una pantasma apaecida; una pantasma con canes acadarmada, de papos sumíos. Una pantasma en moto que  fux de la barrulada, del autista del smartphone, de les putes coyonaes del alma en pena con tolos drechos y denguna obligación. A tomar pel culu, hom.

DOCENES NOTES DE FIN DE SELMANA

Málaga 1-1 Sporting

(0-1)

-¿Patadón? Nun entiendes, bobu. Díxolo Xose Albertu: que’l nuesu ye un fútbol direutu y añádote yo que minimalista, mariconaes les xustes. ¿Nun ves que faló l’otru día d’ataques d’ocho segundos? Los tiquitaques vamos dexalos pa prau, que nun tán pa nós. Fíate de Xose Albertu, que sabe y dar paez que dio cola tecla de lo que pue dar esti Sporting.

(1-1)

-Pero la pareya Allegría Djurdjevic ye innegociable, hom. ¿A cuentu de qué sacó al Uros por Pablín, que ye’l mesmu caballu llocu? Que yá, que yá se vio que nun yera tarxeta colorada pero paeciólo; hai que ser burru, coimes. Menos mal que l’árbitru taba naguando por reequilibrar l’alcuentru, iguar l’estrozu. Pero ye lo mesmo: teo pa min qu’once escontra once yera victoria de xuru. Prestóme tovía más esti Sporting que’l del derbi, nin. Va ser perdifícil que daquién-y meta’l canil si mos respeten les mancadures.

-Oi.

-Dime.

-Uros ye un Guerreru pero a lo bestia.

-Calla, ho. Tremecí col penalti.

-Agora a facer bonu’l resultáu en Tenerife.

-Voi pone-y un dos.

-Encantáu, don Fernando.

-Lo mesmo te digo, Senén.

-Nun sabía que falabes asturianu.

-Yá ves, Senén. Sorpreses te da la vida. Pero esto nun lo cuentes nel foru.

-Qué va, ho. Nun diben creyeme.

Xuacu

-Qué pena lo de Xuacu, ¿eh ho?

-Tu tuvisti con él aquella nueche na que dibeis pasaos de copes y nun paró de falate de cine de ciencia ficción.

-Abluqué colo que sabía. Pasémoslo bien.

-Y dempués tuvistis un bon ratín falando de la hestoria d’España.

-Tamién.

-¿Tamién controlaba?

-La de Dios. ¿Qué nun sabía esi paisanu?

-Bones copes tuvieron que ser.

-De les meyores, Senén. De les meyores.

-Raru yera’l Xuacu, ¿non?

-Más que nós, Senén, que yá ye dicir; pero un cachu pan como él solu.

Rotura

Esta democracia nuesa escrita na Constitución de 1978 y desendolcada a zarapicones déxase ver en campaña eleutoral. Ye nella cuando s’entiende qu’imposible:

Primero. La xente escaso qu’hai con xacíu y conocimientos ta a otros deleres: investigando’l cáncer o faciendo lexicografía, qué sé yo. Metío en política ta la magaya, la xente que nun algamó cosa meyor. La tercer España encueye los costazos, suspira y sigue a lo suyo.

Segundo. La rotura d’España, que quiciabes cuando lo foi foi España per aciu l’ordeno y mando (orde y mandu) del centralismu castellán, ye imposible de coser. Ensin espadones carcamales o progresistes (pal casu son lo mesmo), nun van a ser enxamás a ponese “d’alcuerdu” la esquierda cola drecha, los descendientes de la antigua federación de reinos católicos colos simpatizantes de Felipe V; y menos colos imbéciles del apartáu primeru.