La cadarma que llee

CINÉTICA'L VOTU

Yá fiximos l'oveya, yá depositemos el votu na urna, los votos nes urnes, l'amarronáu Senáu, el blancu oveya pal Congresu. Fáennos creyer que n'exerciciu democráticu universal tamos escoyendo a los servidores del pueblu español y lo que realmente tamos faciendo ye escoyer a los moñecos bien pagaos que sirven a los que tienen más perres. Filera soberanos nacionales delantre la mio mesa eleutural. El paisanu del centru la mesa grita nome, apellíos y númberu más lletra del Documentu Nacional d'Identidá del votante de soberanía compartida. El que ta a la esquierda del paisanu busca nun llistáu los datos gritaos pa marcalos con fosforescencia llimón. El de la drecha ye'l machaca que ta faciendo callu nel deu corazón manuscribiendo los dichos datos gritaos. Devuélvente'l DNI, quiten de les ranures los sobres vacios que les tapen, metes per elles los sobres soberanos pa dientro les urnes, bonos díes y sales del colexu eleutoral con cara fatu satisfechu pol drechu cumplíu.