VELEA CANINA (2). Y ÉL ESMOLECÍU PORQUE PENSABA QUE LLUNA TABA DEXÁNDOSE MORRER

La muyer albeite…

Vamos pero pa la de siempres, la de les vacunes. Entra.

-¿Tu sabes lo que ye carretar na perrera con un solu brazu un bichu de dolce quilos? Pesu en mancuernes el que quieras, ¿pero d’un brazu pal otru parando y posándola, asina seiscientos metros de dir, seiscientos de volver, y ensin tener dormío una mierda en tola nueche?
-Coñu, garrares un taxi.
-Tan esmolecíu taba que preferí carretar con ella. Llegué col aliendu xusto.

Les pastilles de l'albeite taben bien pero mui besties ensin proteición. Indición al bichu. Nun-y les quitar de repente pa evitar efeutos secundarios. Proteición. Dir dándo-y estes otres y esto otro y esti piensu especial.

...

Salir del Santu Oficiu, dexar la Vespa de Senén nel garaxe, prender un pitu y dir pa casa pensando en con qué pues topar: l'estropiciu y un cadabre, l'estropiciu a soles, el cadabre llimpiu arrequexáu, qué facer col cadabre a estes hores, menudu putadón, Lluna arrequexada pero ¡Lluna! Lluna espierta y mírame, ta viva. La comida toa nel comederu. Ábro-y un yogur, de los caros, bífidus, 0,0, con cereales y ñuez: que pa mio, que non, que nun ta pel llabor de cenar. Mézolo col piensu. Peor. Nada. Esta perra polos mios coyones qu'entá nun va morrer; si la melecina fixo efeutu'l quesín tien de ser irresistible. Pastilla y quesín éntren-y a la perra resucitada, resurreuta, cabrona. Paez ser que la melecina pa les ganes de comer solo val pa llambiotaes, non pal piensu especial nin pal yogur. A ver, ¿qué mas llambiotaes hai dientro l'armariu perllimpiu y ordenáu del llar que ta queriendo ser zen? Atún claro al natural, ensin aceite, nun vayamos matala de sobredosis. Na mano doi-y un poquiyín y, coimes, solo-y faltó baillar la danza prima. Hai que ver con estes melecines modernes, tu: nin vomitó en tola tarde y come quesinos y atún claro. Non, pel momentu morrer nun va morrer pero en Lidl voi tener que face-y la compra y acompanga-y l'atún con salsa Lixeresa. Yá si eso quiciabes mañana-y pete un albarín.

VELEA CANINA (1)

Dos telediarios…

El cafiante soníu’l vómitu.

Remanecíu de nun sabe qué tenebreru a les 3,40 de la mañana, por Dios que nun tenga sío onde va tiempu que lo ta imaxinando en velea en vixilia.

Hai dos años que punxo suelu nuevu en casa, ún d’esos de cartón que son bien duros pa les sueles pero pal agua (y pa los vómitos, y más pa los vómitos líquidos de doña Lluna) más malos que pegar a un pá.

Llevántase de la cama con toles telarañes del tenebreru. Sal pal pasadoriu. Cágase en too porque nun ve a doña Lluna na so cama.

Más soníu de vómitu.

La velea fíxose realidá.

Líquidu mariello espardío per tol suelu la habitación que ta enfrente la entrada.

Pis y mierda líquido nel bañu (eso ye lo de menos).

Son les 3,42 de la mañana, una hora coyonuda pa dir corriendo a por un rodiellu a la cocina, dir corriendo coles telarañes a la habitación del estropiciu, mover muebles, agachase, llimpiar, mover muebles, agachase, llimpiar, mover muebles, agachase, llimpiar, mover muebles, agachase llimpiar, mover muebles, agachase, llimpiar, pasar mopa y mover muebles y pasar mopa y mover muebles y pasar mopa y mover muebles…

-Yá ta, hom. Déxalo.

-¡Cago en mio madre, que dempués entamen a hinchar les xuntes!

-Tán bien seques, hosties.

-Teo d’aspirar l’agua que pueda quedar n’elles.

-Que son les cuatro, coyones. ¿Qué quies? ¿Que te la monten los vecinos? Meti a Lluna na cocina, pon-y ellí la cama, pieslla la puerta y que vomite tolo que quiera o puea. Coles pa la cama, pones el programa esi del orixe la vida na Tierra y vuelves a dormir.  

8.45. Tenía puestu l’espertador a les diez. Retrasáralu dempués de los socesos. Pero 8,45. Mexa y entra na cocina. Vómitos mariellos. Fregona. El comederu sigue enllenu: nun comió res en tola nueche. Ofrez-y un cachu quesín. Güel-lu un poco y acaba comiéndolu por compromisu, por nun-y facer un feu al dueñu puteáu. El segundu cachu refúgalu. Hosties, esta perra ta morriendo.

Non, nun muerre, non. Adelantrándolu, cuerre escaleres p’abaxo a la cai. Mexa, trotia, caga líquidu y vomita líquidu y quesín. Ta escosándola la cortisona, la reputa que parió a l’albeite.

El soníu la contraición y el vómitu. Seis vegaes. Tola santa tarde. Na so vida-y pasare eso, asina que-y chamos la culpa a les pastilles, que vamos dexar de da-y. ¿El Sporting-Racing? Ente vómitu y vómitu. Poco -nada- podemos dicir d'él. Tamos tocando madera pa que lo de doña Lluna seya que comía poco y non un cáncer de páncrees, pa que los vómitos tengan venío de la cortisona escondío nel atún y los quesinos y pa que esta nun-y siga faciendo efeutu dempués de la cena porque al contrario yo tírome pela ventana.

P'allá va'l piensu y que seya lo que Dios quiera.

...

Ta rara. Acabo mete-y zucre. A esta perra quéden-y dos telediarios.

PONFERRADINA 2-1 UVIEÍN Y SPORTING-RACING

Sol y ensalada César. David Gilmour en Spotify. L'Uvieín va ganando en El Toralín cero a un a la Ponferradina. Ribeiru tinto. A les cuatro vamos ver si X.A. pon a Manu onde lu tien de poner visto qu'esi esperimentu tan raru con Manu tiráu a banda nun furruló. Empata la Ponferradina. La temporada pasada'l Racing taba en Segunda B. Esta temporada, el Sporting da perceguera, ye esmolecedor.

Pa poco más queremos güei esti sol con ribeiru tinto y ensalada César. A ver si somos quien a ver enteru'l partíu: sedríe la primer vegada na 2019/20. Adelantróse (2-1) la Ponferradina. L'Uvieín nun espoxiga, nun ameyora, nun alica, nun espolleta, nun xorrez. L'Uvieín, l'equipín d'Asturies. L'Uvieín va xubir a primer división cuando lluevan ranes. El Sporting nun sé.

Tamos equí col Casal do Río esperando a que fine l'alcuentru d'El Toralín pa pesllar el testu. Llueu quiciabes venga una película, o un cachu d'ella pa dempués siguir colos llabores del llar que quier ser zen. A les seis el Sporting-Racing. L'Uvieín ta impotente, queda mediu minutu. Dos puntos de ventiún.

EL FORNU LA GUARNICIÓN DE LA CADARMA

Foron esos cuatro años (1979-1983) el fornu onde se cocinó la guarnición de la Cadarma. Cuarenta años dempués equí la tienen tovía escribiendo. Cuarenta tresllaciones alredor del Sol nun son cosa que se puea tomar a risa. Son cuarenta tresllaciones aborronando papeles con pallabres fraguaes cola materia trupo d'aquellos años. Lo que nun ye guarnición ye anterior y ehí sigue dacuando tocando los coyones.

La guarnición entamó a cocinase a 858,6 quilómetros diendo güei pela A-4 y finó na cama con Ada o l'ardor con Aute de fondu. Tolo demás, quier dicise dempués, foi un dir tirando como un güe del carru cuchu en que camudare la guarnición. Tamos agora a puntu de mandar toa esta repla pel sumidoriu d'entós que ta a 858,6 quilómetros diendo güei pela A-4. Bono, cuasi tola repla.

HAI DÍES

Hai díes nos qu'a ún más-y val nun llevantase de la cama y más tovía nun abrir los güeyos pa siguir protexíu nel mundiu submarín de los suaños anque un talu Ernestu te torture con un fierru ingrientu no baxero'l vientre. Bien ceo pela mañana a doña Lluna volvió da-y l'ataque borrachera, n'ayunes, colo que la indixestión queda escartada, ne, y güei ye xueves y non domingu, asina qu'al cuellu y del albeite nun te llibra esta vegada nin Dios, nun me mires con esa cara. Analís de sangre y en media hora tán los resultaos. WhatsApp pa los trés íntimos, Lluna talo y talo, el cafetín con lleche y xelu, dos pitinos güeyando La Nueva España y pa u la muyer albeite, que, amosándome l'analítica impresa, creye que ye cosa del zucre, lo que vien siendo una hipoglucemia llibru; que tendríemos que ver d'ónde vien, una ecografía pa escartar el cáncer de páncrees y si ye necesario operar a doña Lluna.

-Espere, ho. ¿Usté sabe cuántos años tien el bichu? Quince. A doña Lluna nun la abre nin Dios nin gratis.
-Yá...
-Si tien de morrer porque-y llegó la hora, mientres nun sienta dolor que siga p'alantre tomando tolo que seya necesario, que por perres nun ye, ¿pero tayala? Non, home, non.

Ayeri ye güei y doña Lluna, col engañu les pastilles escondíes n'alimentos que-yos presten a los perros y una ración más de comida diaria, trotia y fasta blinca con ganes de fiesta, bien coordinada. Nun mos paez la cosa cosa de cáncer. Sicasí, ayeri foi'l día pa nun espertar, el día que tres lo de Lluna morrió la batería la Honda. Tamién ye verdá que Lluna va pa quince años y la batería pasa de trés y que nun se puen pidir milagros.

L'ONÍRICO

Antayeri tuvieren falando na cai a la puerta'l Santu Oficiu d'Oscar W., que tien una obra que se titula “La importancia de nomase Ernestu”. De resultes, esi talu Ernestu pasó parte la nueche torturando a la Cadarma con una barra llétrica no baxero'l vientre que-y dexó dos angüeñes que pela solombra los güeyos zarraos siempre camuden n'aceitunes verdes qu'alloriáu amosó a la Eximia, que sintió gran pena por él y entamó a comelu a besos pesie a qu'al talu Ernestu, camudáu nun CD, matáralu cutiendo nél, porque les dos aceitunes verdes pudieron más que'l CD frayáu cola imaxe'l talu Ernestu y a lo cabero nin aceitunes, nin tortura, nin barra llétrica nin CD frayáu cuando la Cadarma cayó na cunta que la Eximia nun yera doña De, la dama del so pensar na zona los güeyos abiertos, na que sabe que gana un llector pa perder diez.

ASTURIANÍA

Dempués de los trienios qu'atropa dende'l 97 col vinu a ver quién ye'l guapu que-y vien col cuentu de que carne roxo siempres con tintu agora que lo amarida colo que-y peta, qu'esta nueche ye un Nivei 89 Peñín, d'uva non asoleyao; lo que seya por esmucise pel furacu l'escaecimientu nestes hores caberes lloñe del tratu, por coyones y manduca, cola xente. La xente ta perconvencío de que la vida nel universu ye un milagru y fasta'l más fatu nun quier morrer cuando-y sal un granu nel cuerpu nun vaiga ser que l'universu quede ensin recursos. Esto cafia de la Dios, nun fadien.

Camiento que güei solo va siguime, espublizaes estes pallabres, l'albeite. Y yo m'entrugo: ¿tán los asturianos pa la cooficialidá? Esto mete mieu. Agora que, qué quier que-y diga: cago pal asturianu que nun tien nin puta idea de lo que tamos falando y amás tarrezlo y llueu farda d'asturianía porque ye quien a metese pel gargüelu una caxa sidra. Home ho, que nun me toquen los coyones. Asina mos va perequí, que somos la risión.

Podemos nomalo'l milagru l'agua ferviendo. Tamos llimpiando a vapor un mueble cocina de 1980 y amás de desinfestáu paez que lu metimos na máquina'l tiempu p'atrás.

Esta tarde doña Lluna pegónos un bon sustu. Andolia al debalu per casa, cai, llevántase, nun sabe ónde va, vuelve a cayer, llevántase, buscamos nel smartphone'l númberu de teléfonu de dalgún albeite que tea disponible en Xixón, de xuru que foi la llende trociada de carne que-y dimos pa xintar a falta piensu, cago en ros, pa matanos; ¿pero y si nun yera eso?, ¿si yera que-y llegare'l día? Nun muerras, Lluna; nun me faigas eso un domingu, ho, cago en mio mantu. Garrámosla en cuellu y ponémosla na so cama, quitámos-y el collar, tamos un cachu a la vera d'ella, cariciámosla, tranquilina, Lluna, nun muerras, yá tenemos el númberu d'un albeite, yá tamos pensando en llamar un taxi qu'almita mascotes anque paez que Lluna, chada, va ameyorando.

Tamos (plural maxestáticu o asociativu, nun sé) na Caleya Imaxinaria y tuvimos que peganos con doña Lluna pa que quedare en casa. Puta que la parió.

STAR TREK, FERMI, DRAKE Y LA MADRE QUE LOS PARIÓ (2)

Ye más probable que los platinos volantes que dalgunos quieren ver nos cielos seyan máquines del tiempu nueses, como los paisanos que mos ayudaron en Interstellar, que yéremos nós nun futuru remotu, porque amás de tar la estrella nuna zona afayadiza galáctica, decíemos qu'a mediu camín o más tirando pa la periferia, el planeta tien de tar nuna zona afayadiza solar, onde l'agua seya un líquidu constante, facedor disolvente de vida. Nuna zona afayadiza solar y arrodiando'l sol lo más circularmente posible. Y cola exa de rotación que nun vaiga pa los llaos, estáu que-y debemos a la Lluna, satélite pergrande. Los satélites vienen, como los planetes, de la ñube protoplanetaria. La Lluna non. La Lluna foi'l resultáu de la casualidá d'un hostiazu que-y metió al nuesu un planeta del tamañu adecuáu nel sitiu adecuáu...

-Arrincándo-y un bon bocáu.
-Eso. ¿Mañana'l Sporting qué?
-Si X. A. ye quien a chalos p'alantre...
-Ensin despistase en defensa.
-Teniendo'l balón.
-¿Sabrán?
-¿Nun van saber, ho?
-Nun sé yo.

STAR TREK, FERMI, DRAKE Y LA MADRE QUE LOS PARIÓ (1)

En Star Trek desendolques el motor warp y asomen civilizaciones perdayuri. Como a esti llau del cuentu entá nun tenemos el motor warp, SETI tovía ta buscando, buscando tamién resolver la paradoxa Fermi, sofitada na ecuación de Drake, que-y daba a la nuesa galaxa unes cien mil civilizaciones intelixentes. ¿Ú tán, nín? Tamos arrodiaos d'estrelles a mamplén nuna galaxa que ye una más ente miles de millones y, claro, agarrámonos a la probabilidá matemática, a la ecuación de Drake y a lo que faiga falta, favoratibles a los hermanos cósmicos. Oi, que nun tamos falando de vida a seques, eh. Non. Tamos falando de vida intelixente, y eso ye fariña d'otru costal. Pa que la vida (si ye que ye tan fácil pa ella surdir de la materia) desendolque en intelectu necesítase una estrella de combustión lenta y estable, pa que dure y pa que nun mos achicharre pel camín; la estrella tien de tar lloñe d'españíos de supernoves y fontes varies de rayos gamma, perdañibles; lloñe d'otres estrelles, poro del centru la galaxa pero non nos arrabaldes, onde nun hai metal bastante que dea pal inventu la vida.

-¡Carajo, señor Cadarma! ¿Ya está usted otra vez nutriéndose del DALLA? Mire que quejas recibe usted y muestras de alivio cuando recupera el DRAE.

-La inercia obliga, don Fernando.

-Ye una crisis d'espaciu pa espulsar cien y meter diez, don Fernando. Ye espertar pela mañana y tar yá pensando en tirar, en desmontar y tirar.

-El derrumbe de la psique.

-Sedrá.

-Lo que a ti te pasa es que te estás haciendo zen. Zen espacial. Que por algo se empieza. Tenemos que te ha iluminado el Espíritu Santo y ahora necesitas liberar espacio, librarte del cascajo que tupe tu espíritu.

-Home, visto asina...

-Te estás purificando, Senén.

-Sedrá. Yá to pensando en llevantame mañana pa desmontar y tirar y mete-y Solac de cuatro bares a lo que va ser llar zen.

-Hogar, dulce hogar, y más si uno no va tropezando por él.

-¿Tien usté un robó d'esos qu'aspiren y freguen?

-Fundamental. Lo programas y a rezar padrenuestros.

Xente alvertío del Santu Oficiu cuantayá que lu tien. Val pa toa clas de suelos, inclusive esos de cartón que nomen tarima flotante que nun flota nin nada, decodifica Senén.

-Gente perspicaz del Santo Oficio hace siglos que lo tiene. Sirve para toda clase de suelos, incluso esos de cartón que llaman tarima flotante que no flota ni nada que se le asemeje. El jodido robot. Antes de desfallecer de inanición laboral, regresa a su pesebre de electricidad.

-Pos a ver si me lu va financiando usté. Non p'agora, hom. Pa cuando esti cristianu tenga tirao tolo que cafia la tiesta.

Desarmando un arcón y arrancando mierda fueron tres viajes matinales al depósito de residuos con los dedos de la edad anquilosados por el peso de las tablas y menos mal que poco trapo a causa de la bondad del agua hirviendo. Pa entós don Fernando taba tan pacetible al so cafetín puro cola galleta y La Nueva España esfrutando del tiempu atropáu polos casi cinco sieglos que tien de vida y que Senén no cuenta vivir con lo que su organismo de alcohol ha acumulado y de cigarros sin filtro, asina que'l mio deprendimientu tien de ser rápidu y pa pocos años porque nun algamo la edá nin del Chalaneru, que pasa sobráu de los cien. Lo que se quiere decir es que Senén hoy ha trabajado como Pepe el Hijoputa y don Fernando folgó lo que quixo y más y que n'Asturies güei hai un coma cuatro trabayadores por cada pensionista, poro ye meyor morrer pronto pol bien de la sociedá y pa que don Fernando siga gociando del so merecíu reposu.

Tien Senén un bon llabor per delantre, acostumáu más a pallabres qu'a obres. Ta agora metíu en desescombrar delles dependencies del Santu Oficiu mientres don Fernando, va cuatrocientos ventitrés años, un día como ayeri se lucía a sí mismo el amor por el mercado y en cuarta letra del alfabeto el día remataba con tres sendas parejas de vino, blanco él, tinto ella. Falaron de la intimidá na intimidá mirándose averaos a los güeyos de la que Senén, cuatrocientos veintitrés años exactos después, vaporizaba, azulejaba y desescombraba metá agradecíu.

-Escribes textos muy raros, como en bable y en castellano a la vez -nos ha dicho esta tarde una compañera del SO.
-Sí, claro. Senén y Fernando Niño de Guevara.

Senén, enantes d'entamar a pidimiar énte la puerta la ilesia San Llorienzu, estudió y llicencióse en filoloxía, como l'alcaldesa Xixón. Senén ta llicenciáu en filoloxía hispánica. Cuando Senén finó los estudios, nun esistía la filoloxía asturiana, y pa cuando la punxeron Senén yá cayere nel oficiu méndigu. Por una mujer, en 1997. Por aciu una muyer entamare a beber y bebió y bebió y bebiendo perdiólo too y bebiendo siguió leyendo y bebiendo se leyó a los clásicos que no había leído en la facultad, lleó a los grandes del sicoanálisis y fíxose con conocimientos de matemátiques, hestoria, filosofía y cosmoloxía pa siguir pidiendo na ilesia San Llorienzu, fasta qu'estos díes tocó de morros no fondero y sintió la angustia del vacío del callejón sin salida, que es como la del pozo en prospección final.

-¿Cómo te va, Senén?
-Equí, enguedeyando al personal.
-¿Y eso?
-La xente creye qu'esto ye cosa la Cadarma.
-¿La Cadarma?
-El señor Alministrador, hom.

Tenemos a Senén y a NdG tomando dos albarinos na Caleya Imaxinaria refugaes les tapes de frutos secos. Nun hai fame. Ún polo uno, l'otru polo otro.

-Toi frayáu, don Fernando, cago en ros.
-El que algo quiere algo le cuesta, hombre.
-Yá, hom, pero ye que me pasé les hores azulexando ensin parar, un domingu, el día d'Asturies pa más inri.

Nes teles, cuatro pa más señes, ta xugando Rafa Nadal nun sabemos qué perimportante, nel primer día dempués de la illuminación de Senén.

-Recuerdo aquel día, Senén, como si fuera, de brillante que lo vivo, hoy por la mañana. Aquel día plácido, de reflejos que se prolongan hasta ahora mismo, cuatrocientos veintitrés años después. Diferente, como de comunión profana, dos almas en cuerpos cercanos, entrañable tren de vía estrecha.
-¿Qué me ta cuntando, don Fernando?
-Las maravillas perdidas de la FEVE, Senén. Como cuando tú en Vespa te mueves por las parroquias a ritmo de camino vecinal.
-¡Ah, coño! Toi frayáu, don Fernando. Nun-y veo la rellación.
-Te hallas al comienzo de la senda de la sabiduría, esa que te va a llevar a la entrega, a darte al otro.
-¿Qué otru, don Fernando?
-¡Cojones, Senén, el que te arreó la hostia!
-¡Hosties...! ¿Ta falándome d'amosar l'otru papu?
-Y por fin logró que vieras. No te queda otra, Senén.
-Tamién ye verdá, pero toi frayáu, don Fernando. Muncha parede azulexada
-Y lo que te queda, Senén. Pedes in terra ad sidera visus. Buen albariño. Aquella tarde tan cercano a ella... El brote del fruto del árbol de nueve años... Alma mater, Senén; alma mater mi doña Do.

-¿Te parece bien Mantenimiento?
-Claro, don Fernando. Munches gracies.
-Empiezas mañana, domingo, festivo. A las ocho. Cobras aditamento.
-Estupendo.
-¿Estamos rimando? Oye, hablando de rimas, ahora que te encuentro algo mejor, ¿te expongo el discurso del secreto?
-¿Esi qué discursu ye, hom?
-El que te va a evitar más hostias en el futuro.
-Suéltelu.
-Bueno. La señora, tu señora, esposa o barragana, tradicional novia o comunista compañera, ante todo -ante todo-, y pásate por el bajo arco de la indiferencia las palabras escandalizadas de quienes afirman que es imposible, ha de ser tu mejor amigo, así, en género gramatical masculino. Tu mejor amigo.
-Home ho, nun fadie; eso nin el Ramiro Calle. Usté ye que tien cuatrocientos setenta y ocho años, nun me joda. Asina cualesquier lo tien deprendío y prauticao.
-Sí, Senén. Desde que tenía exactamente tu edad. Hasta entonces, habían llovido hostias egocéntricas como chuzos alterados de álter, áltera, álterum, en latín “lo otro”, lo que no eres tú. Tu mejor amigo. Y tu mejor amigo, esa señora tuya, es un baluarte ante la indiferencia del mundo y la maquinaria de los psicópatas, muchos más de los que la medicina reconoce como tales en sus DSM. Has de ser cómplice de esa mujer frente al mundo. Y ahora tengo que dejarte, que, a mi edad, ya son horas de ir recogiéndose en puerto seguro y tú mañana allí sin retraso a las ocho.
-Con Dios, don Fernando.
-No me toques los cojones, Senén.
-Yera coña, hom.

-Que lo dexo, don Fernando.
-Que dejas qué, Senén.
-Siguir pidiendo a la puerta la ilesia San Llorienzu.
-¿Y eso?
-Que fasta equí lleguemos. Que nun puedo siguir viviendo asina.
-Eso está muy bien, Senén.
-Yá, hom. Diéronme un bon toque que me fixo ver nidio que nun pueo siguir asina.
-¿Cómo que un buen toque?
-Un toque escritu, bien escritu, nidiu, con pallabres que remueven y remociquen. Yá sabe usté que siempres me prestó que me dixeren clares les coses.
-A todo el mundo, hombre de Dios.
-Convídolu a xintar.
-Eso no se puede rehuir.
-De puta ma. Oiga, ¿nun tendría pa mio un puestín nel Santu Oficiu?
-Algo hay. Pero vas a jurarme por el mismísimo Jesucristo que lo piensas en serio y meditado.
-Que lo dexo, don Fernando. Que m'espetaron nel corazu la navaya'l verbu. Que teo d'ordename, que yá voi teniendo cierta edá.
-Te ha iluminado el Espíritu Santo.
-Nun seya coñón, señor Niño.
-¿A qué hora?
-¿El qué?
-El qué coño va a ser, Senén: la comida ofrecida.
-Ah, hom. ¿Val-y a les dos?
-Me vale. E informado de la temporal, ¿cuáles son las coordenadas espaciales?
-Ah, hosties, ye que nun toi a lo que toi. La Caleya Imaxinaria.
-A las dos ahí como un clavo.

Como tar al borde l'horizonte socesos. Una mierda. Tamos nesi espaciu nel que la ecuación qu'hai qu'aplicar ye la d'apertar el dentame más tiempu, díu al coñu l'universu.

-El universo no se ha ido al coño, Senén. De un empellón te ha mandado a ti al quinto ídem. Ergo quien se ha ido al coño eres tú. Sé coherente con tu propio enunciado. Goloso este albariño.

-Déa-y ensin medrana.

Pos que, como diz don Fernando, díu yo, Senén Martínez González, al quintu coñu o coñu a seques, toca agora plizcase con fuercia los güevos pa berrar por aciu daqué que duelga. Amás, podíemos tar peor, que don Fernando lleva aguantándome'l rollu tola santa tarde y pa encima convidóme a un Enate onde'l Nanu.

-No hay de qué.

-¿Peta-y un Tramuz, don Fernando?
-Ordena un poco esta cochiquera, Senén.
-Ye que toi fadiáu, hom.
-A ver, ¿qué pasó en esta vuestra historia interminable?
-Que terminó.
-Me sirvo el Tramuz. ¿Cómo que terminó?
-Que terminó, don Fernando; que-y dixi qu'a lo meyor yera meyor finala y dixo que sí ensin ceguñar. Yo díxi-ylo por tantiala, yá sabe usté. Abluqué. Díbemos facer nueve años xuntos.
-Bueno, Senén, juntos, lo que se dice juntos... La tuviste al principio comiendo de la palma de los dígitos y ya te dije yo que con esta te estabas equivocando haciéndole pagar los platos rotos de la Eximia. ¿Te lo dije o no te lo dije? Joder, Senén, haces la carne al punto de sal y plancha como Dios. Si ordenaras un poco esta pocilga... ¿Y ahora qué?
-¿Agora? Qué sé yo. Menudu añu de mierda, don Fernando. Toi collechando lo semao dende lo de la Vaxina Rancorosa.

¿Y qué será de Senén a partir de ahora mismo, las 22,02 de este aciago jueves 5 de septiembre? ¿Será capaz Senén de seguir avanzando por la edad esta vez con la cabeza fría? ¿Habrá aprendido algo de los ouróboros anteriores? Cómo contarle, cómo dici-y a ella que ta falando de verdá, que camudó col pasu'l tiempu la compaña si no lo cree por el precio que ha de pagar por haberse rebelado contra la Eximia, la maldita Eximia que-y fadió les coraes bien dientro por esa concatenación de dos mujeres opuestas.

-Ordena la casa, Senén. Hazme caso.

CRUCIADA CUÁNTICA

Quien escribe trevesando la ponte, pela autovía que va perbaxo un coche atropelló la so solombra. Nun pasó res: nel macrocosmos, coche y solombra pertenecen a dos realidaes que quiciabes solo se toquen nel mundiu cuánticu, onde'l fotón ye tan ondacorpúsculu como los que faen el coche.