La cadarma que llee

VELEA CANINA (1)

Dos telediarios…

El cafiante soníu’l vómitu.

Remanecíu de nun sabe qué tenebreru a les 3,40 de la mañana, por Dios que nun tenga sío onde va tiempu que lo ta imaxinando en velea en vixilia.

Hai dos años que punxo suelu nuevu en casa, ún d’esos de cartón que son bien duros pa les sueles pero pal agua (y pa los vómitos, y más pa los vómitos líquidos de doña Lluna) más malos que pegar a un pá.

Llevántase de la cama con toles telarañes del tenebreru. Sal pal pasadoriu. Cágase en too porque nun ve a doña Lluna na so cama.

Más soníu de vómitu.

La velea fíxose realidá.

Líquidu mariello espardío per tol suelu la habitación que ta enfrente la entrada.

Pis y mierda líquido nel bañu (eso ye lo de menos).

Son les 3,42 de la mañana, una hora coyonuda pa dir corriendo a por un rodiellu a la cocina, dir corriendo coles telarañes a la habitación del estropiciu, mover muebles, agachase, llimpiar, mover muebles, agachase, llimpiar, mover muebles, agachase, llimpiar, mover muebles, agachase llimpiar, mover muebles, agachase, llimpiar, pasar mopa y mover muebles y pasar mopa y mover muebles y pasar mopa y mover muebles…

-Yá ta, hom. Déxalo.

-¡Cago en mio madre, que dempués entamen a hinchar les xuntes!

-Tán bien seques, hosties.

-Teo d’aspirar l’agua que pueda quedar n’elles.

-Que son les cuatro, coyones. ¿Qué quies? ¿Que te la monten los vecinos? Meti a Lluna na cocina, pon-y ellí la cama, pieslla la puerta y que vomite tolo que quiera o puea. Coles pa la cama, pones el programa esi del orixe la vida na Tierra y vuelves a dormir.  

8.45. Tenía puestu l’espertador a les diez. Retrasáralu dempués de los socesos. Pero 8,45. Mexa y entra na cocina. Vómitos mariellos. Fregona. El comederu sigue enllenu: nun comió res en tola nueche. Ofrez-y un cachu quesín. Güel-lu un poco y acaba comiéndolu por compromisu, por nun-y facer un feu al dueñu puteáu. El segundu cachu refúgalu. Hosties, esta perra ta morriendo.

Non, nun muerre, non. Adelantrándolu, cuerre escaleres p’abaxo a la cai. Mexa, trotia, caga líquidu y vomita líquidu y quesín. Ta escosándola la cortisona, la reputa que parió a l’albeite.