VIEYOS DAVERES, VIEYOS DAFECHU

Va pa ventiocho años que trabayamos pal Santu Oficiu, un más de los que teníemos de vida cuando entamemos a trabayar pa él, lo que da pa pensar que somos vieyos daveres, vieyos dafechu. En 1991 cayimos del nieru de lo posteologal de la Teologal de Pilares de llatines y sintagmes sustantivos pa la chambonada de la xente ordinario d’almes en pena. En 2002 llantemos el culu en siella en propiedá (derechu llegal que-y da a daquién tol poder d’usar daqué –DALLA-) nel arrabalde del sur, y lo que foi un referver de puxu ya ilusión foi escureciendo de llume a solombra y de solombra a ñegrura con un puntín de lluz per onde esmucir p’hacia  los dolce años que mos queden y tener fechos a lo cabero los cuarenta de Santu Oficiu, si Dios quier.

285-324

Gran xantar-y faen al bon Batallador.

Suenen les campanes en San Pedro a clamor.

Per Castiella oyendo van los pregones,

Que se va de la so tierra mio Cid el Batallador;

Unos dexen cases y otros heredaes.

Nesti día a la ponte d’Arlanzón

Ciento quince caballeros toos axuntaos tán;

Toos entrugaben por mio Cid el Batallador;

Martín Antolínez a ellos acoyó.

Van pa San Pedro u ta’l qu’en bon momentu nació.

Cuando lo supo mio Cid el de Vivar,

Que-y ta creciendo la compaña, pola que más poder tendrá,

Apriesa acabalga, sale a recibilos;

Volvió a sorrir; avérense a él toos, la mano-y van besar.

Faló mio Cid con tola voluntá:

“Ruego a Dios y al Espíritu Santu,

Por qu’a vosotros, que por min dexáis cases y heredaes,

Enantes que yo muerra, dalgún bien vos puea facer;

Lo que perdáis doblao lo vais cobrar.”

Prestó-y a mio Cid tar creciendo en poder;

Prestó-yos a los otros homes toos los que con él tán.

Seis díes de plazu pasaron yá;

Queden tres, sabéi que non más.

Mandó’l rei a mio Cid vixilar,

Que, si dempués del plazu na so tierra lu pudieren garrar,

Nin por oru nin por plata pudiere escapar.

El día finó y la nueche quier entrar,

A los caballeros mandólos a toos axuntar:

“Oíi, homes, que nun vos pese;

Poco traigo, davos quiero la vuesa parte.

Acordáivos de cómo lo tenéis que facer:

Pela mañana, cuando los gallos canten,

Nun vos retraséis, encargavos d’ensiellar;

En San Pedro a maitines tocará campanes el bon abá,

La misa va dicinos, la de la Santísima Trinidá;

La misa dicha, vamos acabalgar,

Ca’l plazu yá ta acercándose, muncho tenemos d’andar.”

Como lo mandó mio Cid, asina han de facelo toos.

Pasando va la nueche, viniendo la mañana;

A los segundos gallos, acabalguen.

261-284

L’abá dixo-y que con munchu gustu. Equí tenéis a doña Ximena, que va llegando coles fíes. A caúna traila una ama; pónenles delantre. Doña Ximena arrodiyóse énte’l Batallador: lloraba, besó-y les manes: “¡Ten misericordia, Batallador, que norabona nacisti! Esterráronte por culpa de malos encerriscadores. ¡Por favor, Cid, tu que yes un home de pies a cabeza! Equí tamos énte ti yo y les tos fíes; son bien pequeñes: tienen díes. Tamos coles mios sirvientes, que mos tán atendiendo mui bien. ¡Sé que marches y que tenemos que separtanos. Dinos qué facer, por amor de Santa María!” 

Baxó les manes el de la guapa barba; garraba en cuellu a les fíes; averóles al corazón, ca muncho les quería. Llora, suspira fondamente: “Ai, doña Ximena, la mio muyer tan perfeuta, quiérote tanto como a la mio alma. Yá ves que tenemos que separtanos: yo voime y tu quedes equí. ¡Ruega a Dios que yo tenga suerte y sobreviva pa que pueda siguir coyendo en brazos a les mios fíes y atendiéndote a ti, muyer honrada.

L'UVIEÍN CABREÁU

Madre mía, los del Uvieín yá nun saben qué facer p'algamar la primer división y agora anden a berríos esbabayaos pol un a cero que-yos calcó'l Sporting. Qué mal perder tienen los probinos. El complexu capitalín quéda-yos demasiáu grande na so cabezona provinciana lloñe de la mar. Toi falando de los uvieístes faltosonos, non de los uvieínos con xacíu, que de xuru tien d'habelos. Tienen aquellos la mentalidá ridícula de los madrilistes fatonos pero en nano, qu'inda ye más ridículo.

226-260

Espidióse esti home tan sensatu en fechos como en pensamientos. Suelten les riendes y aguiyen. Dixo Martín Antolínez:

 

-Voi dir a ver a la mio muyer pa tar con ella a soles y desplicá-y lo que tien de facer. Dame lo mesmo que’l rei me quite les pertenencies. Taré contigo enantes que salga’l sol. 

 

Tornaba Martín Antolínez pa Burgos y mio Cid aguiyó pa San Pedro de Cardeña a toa espuela colos caballeros que tan al so gustu lu atienden. Apriesa canten los gallos queriendo resgar l’amanecer. Cuando’l bon Batallador llegó a San Pedro, l’abá don Sancho, cristianu del Creador, rezaba maitines; ellí taba doña Ximena, con cinco ames de provechu, rogando a San Pedro y al Creador:

 

-Tu, que a toos guíes, ampara a mio Cid el Batallador.

 

Picaben a la puerta; supieron la noticia. ¡Dios, qué allegría llevó l’abá don Sancho! Con llumes y candeles foron rápido al corral. Reciben con gran gociu al que norabona nació.

 

-Doi gracies a Dios, mio Cid –dixo l’abá don Sancho-; pos qu’equí te veo, doite agospiu.

 

Dixo’l Cid:

 

-Gracies, señor abá; quedo mui satisfechu. Ocúpome yo de la comida pa los míos. Sicasí, voi date cincuenta marcos por acoyenos camín del estierru; dóblotelos si sobrevivo. Nun quiero causar gastos nel monasteriu. Equí tienes cien marcos p’atender a doña Ximena. Mira esti añu por ella, poles sos fíes y poles ames. Dexo dos fíes bien pequeñes: acuéyeles en brazos; déxoles en tos manes, abá don Sancho. Protéxeles a elles y a mio muyer. Si la despensa queda vacia o mengua, abastezla, que yo asina te lo mando: por cada marcu que gastes, cuatro-y voi dar al monasteriu.

CICLU PERGASTÁU

Nun ye que tea fecho. Non. Ufiertáronmelo y dixi que sí, ensin pensalo. Namás. Eses ocasiones que van camudate la vida hai que garrales al vuelu y hai que saber dicir adiós a lo que ta pergastao, nesti casu un ciclu llaboral de cuasi diecisiete años. Si too va como tien de dir, colo pa la sede central, pa la metrópolis del SO, a trabayar pa documentos y yá non más pa la xente, a ver si soi quien a dir quitando la misantropía acumulada nel arrabalde del sur.

DERBI (2)

El d’antayeri foi un derbi que se ganó más que por fútbol por güevos. Cuatro victories siguíes avalen el nuesu fútbol primitivu de patadón pa un Djurdjevic que se ruempe la cara colos defenses y un Allegría que ye una muria que xuega de llombu que presta velo, y, si non, tán les contres ingleses d’esquina, centru y gol. Y ta tamién dar lleña si hai que dalo. El d’antayeri foi un derbi que se ganó más que por fútbol por güevos, lleña, puxu y contres. L’Uvieín nun esperaba too eso xunto. Güei tovía tán llorando por un gol qu’enxamás foi gol cuando lo que pasó ye que l’Uvieín xugó amariconáu, como tantes veces lo fixo nos derbis el Sporting.

197-225

 

-Merécestelu, qu’esti negociu yá ta fechu y vas ser tu quien mos va garantizar lo pautao.

 

Don Martín recibió los marcos, dio-yos les gracies y espidióse d’ambos. Prestó-y salir de la casa. Yá salió de Burgos, yá trevesó l’Arlanzón. Vieno pa la tienda del que norabona nació. Recibiólu’l Cid colos brazos abiertos:

 

-¡Vinisti, Martín Antolínez, el mio fiel vasallu! ¡Oxalá vea’l día en que puea correspondete!

-Vengo, Batallador, con too a recaldu: tu seiscientos y yo trenta teo ganao. Manda recoyer la tienda y vámonos darréu, qu’en San Pedro de Cardeña mos cante’l gallu. Vamos ver a la to muyer, recordada fidalga. Vamos amenorgar la posada y salir del reinu: ye necesario ca pronto muerre’l plazu. 

 

Namái dicir estes pallabres, recueyen la tienda. Mio Cid y la so compaña acabalguen aína. Tornó pa Santa María la cabeza del caballu, llevantó la mano drecha y santiguóse:

 

-¡Doite les gracies, Dios, que cielu y tierra guíes! ¡Válganme les tos virtúes, gloriosa santa María! Dende equí colo de Castiella, pos teo mui enfadáu al rei. Nun sé si voi volver en tola mio vida. Que’l to poder me protexa, Gloriosa, na salida, y m’ayude; ¡socórrime de nueche y de día! Si asina lo faes y too me sal bien, prometo mandar pal to altar n’abondo ricos regalos, y prométote tamién facer ellí mil mises.

DERBI

Nun hai más qu'enfotase na hestoria recién de los derbis pa pronosticar pa esta nueche un empate a ún. Entama tatexante la llucha, entama a puñar el Sporting colos dos cuernos en punta y acaba por meter el primer gol. Euforia desaxerada n'El Molinón, Quini y Preciáu asomen a velo, cegúñense un güeyu, dende allá arribones tán al tantu lo que yá pasó, ta pasando, va pasar, too nun mesmu sacu eternidá. L'Uviéu, yá lo tas viendo, nin, ta faciéndose col partíu, va arrequexando al Sporting, puxa, puña, truña, churna como un güe azulón pa escontra la medrana'l Sporting y nuna d'estes cálca-y l'empate. Yá ta. Ye asina, collaciu, díxo-y, ta diciéndo-y, va dici-y Quini a Preciáu. Qué-y vamos facer, Bruxu.

PATOXAES A MANZORGA Y MANDRECHA

A les babayaes de la nueva esquierda axuntáronse les patoxaes de la nueva drecha radical. Ye normal, bobu. Tamos nun Estáu nel que'l xacíu común ye'l menos común de los xacíos y amás nun viende un sacre. Mentanto, cuatro ricos van siguir riéndose de cuatrocientos mil probes.

TAMOS MENOS ABURRÍOS

Tábemos toos mui aburríos con aquella democracia qu’asentara en bipartidismu canovasagastista dempués de la bayura de partíos iniciales. La cosa yera entós el paru y a quien lu afeutaba y la ETA, que lluchaba pol independentismu a lo burru y nun posaba del bichu. Demientres, los políticos afanaben a escondidielles a dar con un palu. Como más neciu que la ETA ye l’Estáu, la ETA acabó galdida; y el paru nun hai quien a amenorgalu, ta visto. Tábemos paraos, enritaos cola ETA, peraburríos. Hasta qu’amosaron los focicos quien peraburríos taben hasta los güevos de tanta aburrición, a la qu’amás se sumara’l lladroniciu desatapáu del bipartidismu canovasagastista. Cutiendo nél ente dos frayáronlu en cuatro y sumóse agora a la folixa dixebradora VOX pa dexalu en cinco estayes. El bipartidismu ablucó cola competencia pa plizcar y el PSOE fíxose cuasi d’esquierdes y el PP completamente facha de coyones. Tamos menos aburríos gracies a la nada de C’s, al baturizu los círculos de Podemos y a la fatada de VOX, esa drecha estrema de comedia. Nesti ríu puerco, pesca, ta pescando la metá de Cataluña; nun diba ser menos.

172-196

Pónense contentos Raquel y Vidas col dineru
Porque, demientres vivieren, dambos diben ser ricos.
Raquel va besa-y la mano a Mio Cid:
“¡Oi Batallador, norabona ciñisti espada!
Coles de Castiella pa u la xente foriato.
Asina ye’l to destín, grandes son les tos ganancies,
Una túnica colorada, morisca y apreciada,
Cid, bésote la mano, prestaríame de regalu.”
“Encantáu”, dixo’l Cid, “tomo nota.
¡Si te la traigo d’allá, bien; sinón, garres de les arques monedes pa mercala.”
Nel mediu’l palaciu estendieron una alfombra;
Sobro ella, una sábana de filo mui blanca.
De primeres, echaron de golpe trescientos marcos de plata;
Violos don Martín, ensin cuntalos los garraba;
Los otros trescientos n’oru-y los pagaben.
De la que fixo esto, vais oyer lo que falaba:
“Oi don Raquel y don Vidas, nes vueses manes tán les arques;
Yo, que vos consiguí esti negociu, bien merecía unes calces.”
Raquel y Vidas foron aparte:
“Deámos-y un buen regalu, ca él mos consiguió esti negociu.
Martín Antolínez, burgalés famosu,
Merécestelu, queremos date un bon regalu
Col que pueas mandar facer calces y una rica túnica y un bon mantu.
Dámoste de regalu trenta marcos;

 

 

148-171

Martín Antolínez acabalgó darréu
Con Raquel y Vidas, que diben con munchu gustu.
Nun vien pela ponte, que pela agua pasó,
Pa que naide de Burgos los viera.
Yá tán pa la tienda del Batallador famosu;
Namái entrar, besaron-y les manes al Cid.
Sorrió Mio Cid, taba falándo-yos:
“¡Oi Raquel y Vidas!, ¿escaecístisme, ho?
Yá toi colando de la mio tierra, ca cayí baxo la ira’l rei.
A lo que paez, vais sacar dalgo de mio;
Demientres teáis vivos, enxamás vais ser probes.”
Don Raquel y don Vidas besáron-y les manes al Cid.
Martín Antolínez tenía pautao
Que poles arques daríen-y seiscientos marcos
Y que-y les guardaríen hasta’l cabu l’añu;
Qu’asina-y dieren la so pallabra y xuráren-ylo,
Que, si les abríen enantes, declarárenlos perxuros
Y que nun-yos diere’l Cid nin una mala moneda de lo ganao.
Dixo Martín Antolínez: “Que carguen les arques darréu.
Lleváiles, Raquel y Vidas, y ponéiles a recaldu;
Yo voi dir con vós pa trayer los marcos,
Que’l Cid tien de dise enantes que cante’l gallu.”
¡Teníeis que ver qué gociu al cargar les arques!
Nun podíen llevantales magar taben fuertes.

TUITAES

Twitter ye de lo que nun hai. Agora resulta que'l Ferreras, el de la Sesta, ye un estremista que ta ablanquiando a Vox y al probe tiénenlu puestu disfrazáu d'Arias Navarro el día qu'anunció que Franco morriera, tou porque'l Ferreras convidó a Vox al rebate con PSOE, PP, C's y Podemos y dexó fuera a la ERC. Coño, normal. Primero, que Vox viende la de Dios y eso ye la tele; segundo, que les perspeutives de Vox son acoyonantes; tercero, que la ERC nun pinta pelotada nun rebate ente dreches y esquierdes; cuarto, que-y voi cuntar a mio suegra que'l paisanu esi del flequillu de la Sesta ye de Vox, ella que lu tarrez porque creye que ye de Podemos.

124-147

Bien sabemos qu’él dalgo ganó,
Cuando en tierra moros entró, que grandes bienes sacó;
Nun duerme tranquilu’l que trai munchu dineru.
Coyamos les dos arques,
Metámosles en llugar onde nun seyan vistes.
Mas dinos del Cid, ¿con cuánto va tenese por pagáu,
Y qué ganancia va danos por tou esti añu?”
Respondió astutamente Martín Antolínez:
“Pídevos poco por dexar los sos bienes a recaldu.
Acuéyense-y dende toles partes homes probetayos.
Necesita seiscientos marcos.”
Dixeron Raquel y Vidas: “Vamos da-ylos con munchu gustu.”
“Yá veis que ta entrando la nueche, el Cid tien priesa,
Necesitamos que mos deáis los marcos.”
Dixeron Raquel y Vidas: “Nun se faen asina los negocios,
Sinón primero recoyendo y dempués dando.”
Dixo Martín Antolínez: “Paezme bien.
Veníi au ta’l famosu Batallador,
Y nós ayudarémosvos, que ye lo más razonable,
A carretar les arques y poneles a recaldu,
Que nun lo sepan nin moros nin cristianos.”
Dixeron Raquel y Vidas: “Paeznos bien;
Llevaes les arques, coyéis seiscientos marcos.”

100-123

Raquel y Vidas taben perxuntos,
Contando’l dineru que ganaren.
Llegó Martín Antolínez, astutamente:
“¿Ú tais, Raquel y Vidas, los mios amigos queríos?
A soles quedría falar con dambos.”
Nun lo atrasen, los tres s’apartaron.
“Raquel y Vidas, daime les manes,
Nun me descubráis nin a moros nin cristianos;
Voi facevos ricos pa siempres, enxamás vais ser probes;
El Batallador foi a polos tributos,
Recoyó de sobra grandes bienes
Y quedóse colos que más valíen;
Poro ta asina, porque lu acusaron.
Tien dos arques enllenes d’oru pulío.
Yá veis que’l rei lu aborrez.
Dexó heredaes y cases y palacios.
Les arques nun les pue llevar porque les diben descubrir.
El Batallador ha dexales nes vueses manes,
Y dai-y a cambéu lo que seya razonable.
Coyéi les arques y poneiles a recaldu;
Xuráime los dos
Que nun les abriréis en tou esti añu.”
Raquel y Vidas tán pensándolo:
“Nós en too habemos de ganar dalgo

74-99
La ira’l rei Alfonsu va cayer sobre mi.
Si contigo escapo sanu o pelo menos vivu,
Tarde o temprano’l rei va quereme como amigu,
Si non, lo que dexo nun m’importa un figu.”
Faló Mio Cid, el que norabona ciñó espada:
“¡Martín Antolínez, yes una valiente llanza!
Si sobrevivo, dóblote la soldada.
Gasté l’oru y tola plata,
Bien ves que nun trayo nada y que sedríen necesarios
Pa tola mio compaña;
Teo de facelo a la fuercia, por propia voluntá nun tendría nada.
Si te paez bien, quiero bastiar dos arques;
Vamos enllenales d’arena pa que pesen muncho;
Cubiertes de cueru adornao y bien clavetiaes.
El cueru colorao y los clavos bien doraos.
Au Raquel y Vidas vas dir darréu:
Qu’en Burgos teo vedada la compra porque’l rei tarrezme.
Que nun pueo carretar les arques porque pesen muncho.
Que teo de-y les empeñar polo que fuere razonable;
Que les lleven de nueche pa que nun los vea naide.
Que los vea’l Creador con tolos sos santos,
Que yo más nun pueo facer y que a la fuercia lo faigo.”
Martín Antolínez nun lo atrasaba,
Por Raquel y Vidas darréu entrugaba.
Pasó per Burgos, pal castiellu entraba,
Por Raquel y Vidas darréu entrugaba.

ICONU FRANCU

Francu lleva muertu y soterráu dende peronia pero al independentismu catalán interesó-y resucitalu y la esquierda tragó xorra y anzuelu y equí tamos, hasta los coyones de Francu. Hai yá nesti país una xeneración qu'acueye a Francu a favor o en contra, pa ponelu nun altar o da-y d'hosties, como nós fardábemos del Che Guevara y los otros d'Adolfu Hitler. Francu, agora mesmo, ye un iconu. Aquel cabrón pervieyu y nanu con voz de pitu volvió a ser la idea de la España a la fuercia nel nodo de Vox, que ye lo que quier l'independentismu catalán, que ye'l que resucitó a la momia col cadabre de la cuala xugaba'l probe Zapateru.

50-74

Yá ve’l Cid que del rei nun tenía la gracia.
Partió de la puerta, por Burgos aguiyaba,
Llegó a Santa María, llueu desacabalga,
Arrodiyóse, col corazón rezaba.
La oración fecha, llueu acabalgaba;
Salió pela puerta y xunto al Arlanzón posaba,
Cabo esa villa na sablera posaba,
Mandaba fincar la tienda y llueu desacabalgaba.
Mio Cid Rodrigu Díaz, el qu'en bona hora ciñó espada,
Posó na sablera porque naide lu acueye en casa;
Alredor d’él una bona compaña.
Así posó Mio Cid, como si tuviere en monte.
Tien vedao comprar en Burgos,
De too cuanto ye de comer
Nun s’atreveríen a vende-y nada nin por tol oru del mundu.
Martín Antolínez, el burgalés cumplíu,
A Mio Cid y a los suyos abastezlos de pan y de vinu;
Nun lo compra, ca teníalo él;
De tou alimentu túvolos bien abastecíos.
Allegráronse Mio Cid el Batallador y tolos que van al so serviciu.
Faló Martín Antolínez, vais oyer lo que dixo:
“¡Oi Batallador, que norabona ñacisti!
Descansemos esta nueche y vayámonos pela mañana,
Ca van acusame polo que te di

YE NORMAL QUE VOX

La pantasmada democrático tira'l votu a la rebatina y da perceguera ver a los políticos emburriándose, truñando, berrando. Vergoña ayena. Qué pocu respetu merecen. Fenómenos como'l de Vox dében-yos la esistencia a esi pocu respetu que ñaz d'emburrios y berríos. Que Vox tea equí ye normal, tan normal como que tengan estao Francu y Primu Rivera y Armada quixera tar. L'estremismu diestru fai apaición más pola incapacidá de la drecha que por medrana (que tamién) a la esquierda; apaez cuando la drecha ta faciendo'l gansu tanto o más que la esquierda. Asina que ye normal que Vox yá tea equí. Yá diba tardando.

UNIVERSU PA LOS QUE TIENEN FÍOS

‌Hai xente a calderaos, a fartar, a palaes, a mamplén, y la xente sigue faciendo xente, y la xente quier que la xente siga faciendo xente por esi horror al vacíu que siente la puta bioloxía. Pa ellos esti planeta que viaxa alredor del Sol que viaxa pela galaxa que viaxa pel universu que viaxa pel multiversu. Ye morrer yo y dir too a tomar per culu. Tien d'haber xente pa que l'universu siga tando ehí viaxando pel multiversu. Asina que s'esmolezan pol putu planeta esti de los coyones los que tienen fíos, qu'abluquen col putu universu esti de los güevos los que tienen fíos, que remociquen l'ecosistema los que tienen fíos. Ensin fíos, con pata y media camín de lo que nun ye, doime al gociu del hedonismu del carpe diem y que la Tierra arreviente con toos nós si-y peta. A mi dame lo mesmo qu'a la galaxa entera la trague un furacu negru permasivu, qu'a la Tierra la faiga cachos el planeta Murnia de Lars von Trier.

35-49

Los de Mio Cid llamen a voces,
Los de dientro nun-yos tornaben pallabra.
Aguiyó Mio Cid, a la puerta llegaba, sacó'l pie del estribu, una patada-y daba;
Nun abre la puerta, ca taba bien pesllada.
Una neña de nueve años averóse a él:
"Oi Batallador, qu'en bona hora ciñisti espada!
El rei vedólo, anueche llegó la so orde,
A bon recaldu y fuertemente sellada.
Por nada nun mos atreveríemos a abríteles nin a acoyete;
De facelo, perderíemos les pertenencies y les cases,
Y amás los güeyos de les cares.
Cid, col nuesu mal tu nun ganes nada;
Mas el Creador te vala con toles sos virtúes santes."
Esto dixo la neña y tornó pa la so casa.

26-34

Y qu'aquelli que-y la diere supiera verdadera pallabra;
Que perderíe les pertenencies y amás los güeyos de la cara,
Y tovía más los cuerpos y les almes.
Gran duelu sentía la xente cristiano.
Ascuéndense de Mio Cid, ca nun s'atreven a dici-y nada.
El Campeador encaminó pa la so posada;
Asina llegó a la puerta, alcontróla  bien pesllada,
Por mieu al rei Alfonsu, qu'asina lo convinieren,
Que si nun la quebrara por fuercia, nun-y la abriere naide.

UNIVERSU PA LOS QUE TIENEN FÍOS

‌Hai xente a calderaos, a fartar, a palaes, a mamplén, y la xente sigue faciendo xente, y la xente quier que la xente siga faciendo xente por esi horror al vacíu que siente la puta bioloxía. Pa ellos esti planeta que viaxa alredor del Sol que viaxa pela galaxa que viaxa pel universu que viaxa pel multiversu. Ye morrer yo y dir too a tomar per culu. Tien d'haber xente pa que l'universu siga tando ehí viaxando pel multiversu. Asina que s'esmolezan pol putu planeta esti de los coyones los que tienen fíos, qu'abluquen col putu universu esti de los güevos los que tienen fíos, que remociquen l'ecosistema los que tienen fíos. Ensin fíos, con pata y media camín de lo que nun ye, doime al gociu del hedonismu del carpe diem y que la Tierra arreviente con toos nós si-y peta. A mi dame lo mesmo qu'a la galaxa entera la trague un furacu negru permasivu, qu'a la Tierra la faiga cachos el planeta Murnia de Lars von Trier.

15 - 25

Mio Cid Rodrigu Díaz en Burgos entraba,
Na so compaña sesenta pendones; salíen a velu muyeres y homes,
Los burgueses y les burgueses asomen peles ventanes,
Llorando pelos güeyos, tantu dolor sentíen!
Peles sos boques toos razonaben:
"Dios, qué buen vasallu, si tuviera buen Señor!".
Convidaríenlu con munchu gustu, mas dengún nun s'atrevía;
El rei don Alfonsu tanto lu tarrecía
Que, enantes del anochecer, a Burgos llegó una orde suya,
A bon recaldu y fuertemente sellada:
Qu'a Mio Cid Rodrigu Díaz naide nun-y diera posada.

FRANQUISMU YA ILESIA

Dos obuses ufiertábente'l platu'l día a preciu estudiante. Entráremos na Teologal mazcaraos d'anarquismu d'Agustín García Calvo y terminemos trevesando la entrada los obuses un meudía pa xintar llenteyes y daqué más, postre incluyío, por doscientes cincuenta pesetes na División Azul. L'anarquista faciéndo-y una vez más el xuegu al fascismu, esta pol amor d'una moza que taba como Dios. Enfrente, los comedores de la Cocina de Caridá de Pilares: ún a preciu simbólicu pa méndigos (venticinco pesetes o quiciabes menos), l'otru (cien pesetes) pa universitarios; el mesmu menú en dambos. Franquismu ya Ilesia. Na Teologal, bocadillos y sándwiches. Había beca pa matrícules, trenes de dir y venir y manduca. Cola propina los domingos, cerveces y cafés. Nun fumábemos.

Pelos sos güeyos tan fuertemente llorando,
Tornaba la cabeza y tábalos catando ;
Vio puertes abiertes y postigos sin candaos,
Perches vacies sin pieles y sin mantos,
Y ensin ferres y ensin azores mudaos.
Suspiró Mio Cid, ca tenía cuites mui grandes.
Mio Cid faló poco y bien:
“¡A ti m’encomiendo, Padre, que tas no alto!
A esto me traxeron los mios enemigos malos.”
Ellí aguiyen, ellí suelten les riendes.
A la salida de Vivar, atoparon con una corneya pela drecha;
Y entrando en Burgos, atoparon con otra pela esquierda.
Encoyó Mio Cid los costazos y sascudió la tiesta:
“¡Albízores, Álvar Fáñez, ca mos esterraron!”

@LaCadarma

Hai llibros que camuden en viaxe como hai viaxes que camuden en llibru. Llibros y viaxes pa los que'l sentíu ta nel momentu del camín y nos qu'ún desenllaz de toes toes en murnia porque llibru y camín acabaron.

AL BAUDITE AL BELLUME

Quién nun va al baudite pela vida cegáu al bellume? Usté? Allégrome. Al usté esi, de la que lu ve pela cai, párase a miralu al revisgu otru usté pa ver cómo lo fai pos ye cierto que nun-y ve colgaes de les ñarices gafes de sol nin polarizaes nin ensin polarizar. L'usté esi anda pel mundiu los vivos a güeyu descubiertu pero, ai nin, ceguña que da gustu velo, velu ceguñar coles llárimes  del dolor basáu na lluz enfrente que-y ta metiendo pelos güeyos bien de fotones al bellume xusto enantes de la ceguera común. Resultó que l'esi qu'afirmó dir seguru ensin gafes pente los mortales espublizáralo en Facebook y recibiera cientos de likes de xente que tampoco nun necesitaba, dicía, gafes de sol.

TWITTER, FACEBOOK

Twitter ye un baruyu a manzorga y a mandrecha, los unos a rodapiellu los otros, al aviesu ensin posibilidá d'alcuentru nengún. Una xigantesca tertulia nacional de sordos, que nun hai sordo peor que'l que nun quier oyer. Facebook, colos sos bichinos, amiguinos y likes, comparáu con Twitter ye una de Walt Disney Company. En Twitter la mayor estroza a degüellu celébrase en trending topic. Nel Facebook, amenorgáu a los amigos Facebook, el dañu ta de goña, normal si facemos mientes de que los amigos Facebook tienen más o menos cierta correspondencia cola realidá estrallingüística de los conocíos. De Twitter de xemes en cuando esmuzo pel furacu del xacíu común. En Facebook voi calteniéndome en muries socesives.

ESTA ESPAÑA FELPEYA

Coles telecomunicaciones quiciabes (toi apocalípticu) tocando techu, n’España volvimos pa los tiempos de la CEDA y el Frente Popular. Más de trenta años de silenciu y escuridá nun pasaron en baldre. España, como’l pote o la fabada, tien de cocinase a fueu lento. Nun se pue facer una España democrática a toa mecha queriendo recuperar el tiempu perdíu, a tou gas a galmiaes fuxendo d’esos trenta y seis años de fabada y pote democráticos ensin cocer. España inda nun ta fecha. O ta mal fecha. La idea d’España rompió en tres, como antaño, y, como antaño, franció en cachos independentistes. Franció, rompió en drecha, esquierda ya independentismos porque ta a años lluz de fueu lento de la España federal que por fuercia tien de ser esti tarrén de cultures y llingües mecíes tovía en berces pero non pote, en fabes pero non fabada. Esta España felpeya del 78.

SPORTING 1-0 ALMERÍA

L'Uvieín toles temporaes lo mesmo: tien mal d'altura. Empieza a afogase en marzu y tien de baxar pal campamentu base. Nun deprende a dosificar l'ascensu. Entama a ver llonxe, pequeñín, al Sporting pel espeyu retrovisor, ponse nerviosu, abarúyase, dexa d'atinar, empapiza y afuega. Fálta-y osíxenu sicolóxico. Va ser eso: el mal d'altura sumáu al Sporting a diez puntos perbaxo nel altor del monte, güei cinco. Va espoxigando otra vegada'l Sporting nel espeyu retrovisor del Uvieín, tanto qu'al Uvieín-y entra la medrana de llegar a El Molinón n'igualdá condiciones.

FESTIVAL DE FAMIENTOS DE TRABAYU

Pa siguir alloñáu del tenebreru que conduz a Segunda B un empate que nun val pal enfotu na lluz, que pensar en ganar a un Almería que vien llanzáu ye enfotase demasiao. El Sporting d'equí a mayu nun va poder xugar n'El Molinón los domingos pola mor del Santu Oficiu, como lo oyen. Tampoco nun va haber Rastru. Mañana ye'l festival, en Xixón, de la necesidá, lo que nomen oposición en masa. Llexón de famientos de trabayu n'Asturies. Van vinir más domingos paicíos en selmanes nes que'l Sporting va tener que xugar en sábadu. Xixón, el Sporting y el SO de la mano nesta Asturies que naide nun quier que dea pa más.

¿Paga la vida la pena de vivila? Pa dos mil doscientes persones al día ta claro que non. La ciudá o’l pueblu, la rexón, el país, el mundiu, la galaxa, tol putu universu y los sos universos paralelos son una cagada que nun paga la pena siguir viviéndola. Nada menos que pa dos mil doscientes persones al día que nun quieren siguir acostinando cola vida esa humana, regalu maraviosu pa otros, penitencia con dalgunos momentos bonos pa la mayoría. ¿Cuántos d’esos que se suiciden tuvieron fios? Tener fíos y llueu suicidase ye l’exemplu’l sinsentíu: creé vida y quítomela; pos a arrascala, nin: tas na segunda división de los suicides. Sicasí, ye d’almirar el suicida que nun quixo tener y nun tuvo fíos, suicida de primer división que se llanta énte Dios o’l Big Bang  o l’Universu Estacionariu y-yos diz mirái, nun la quixe nin pa min nin pa nadie, asina que metéivos la esistencia pel astronómicu culu y ehí vos quedáis, dinamítovos en bloque, fíos de puta. Esi suicida merez un respetu fondu. 

L’AMENORGAMIENTU LA EDÁ

Cayó güei un bastiazu que dexó pingando “El tiempu de Manolo” dientro la mochila, que caló nel trayeutu en moto camín del SO al garaxe. Téngolu a secar. Ta fadiándome porque ye llibru de biblioteca pública qu’amás taba nuevín porque lu lleeron cuatro gatos asturianistes. Pa una vez que nun guardo’l procuru de metelu nuna bolsa plásticu de les de conxelar alimentos, llueve que pa qué y cala la mochila col llibru dientro pa encima mal allugáu, que ye’l sitiu d’atrás: abellugáu na mochila pegáu al llombu del motorista llibraba. Pa lleer, si nun yes maniáticu, val de sobra, pero un bibliófilu testeriáu nun va ser a afayase nél; val Dios qu’un bibliófilu yá lu tendrá mercao y numberao na so biblioteca particular. A la Cadarma da-y lo mesmo llibru que fotocopia, papel que PDF o epub, ordenador que táblet o ebook de tinta electrónico. La Cadarma dexó bien llonxe les maníes bibliófiles consciente de que pal cementeriu nun va llevales. La Cadarma deprendió a amenorgar la lliteratura al testu. Tamién ye verdá qu’enantes facía semeyes con réflex analóxiques y dixitales y agora failes col smartphone y qu’escuchaba música d’un Technics modular con bayura vatios musicales y agora oye Spotify nesi smartphone con unos bluetooth Xiaomi pequeñinos. Sedrá l’amenorgamientu la edá.

Como nos axuntamos dos que nun somos gota comediantes, fuximos del entierru la sardina pa comer parroches. Garremos la carretera autonómica, vacia, y colemos pa Lluanco pa llegar n'horariu de xinta européu. Saliónos bien: chigre y terraza pa nós y atención darréu. Botellina sidra (corchu amañáu pal escanciáu triste d'interior -afuera tiraba'l vientu-), unes llámpares nuna salsa marrón picante y una docena d'hermanes pequeñes de la sardinona del antroxu dirixíu que dixo la paisana que llegaren güei.

Lo primero que fai'l llector del señor Cueto ye metese en Google Maps y tecliar "Perendi". Nun pierdan el tiempu los llectores futuros. Perendi ye como'l Macondo de Márquez o'l Yoknapatawpha de Faulkner. Perendi ye un alverbiu tresformáu en topónimu. Perendi significa "perhí". Llástima: yá nun se pue facer viaxe lliterariu que nun seya'l del suañu de les lletres.

EL PERRU TROTSKY

Ye bona neña, ta faciendo cuartu añu de MIR y esta nueche va amazcarase de Frida Kahlo.

-Coño, l'amante de Trotsky!
-Non, la pintora.

Yá tamos, pensé, una que m'escuerre a hosties pola observación machista.

-Yá, hom, la pintora, la de les ceyes xuntes.
-Esa.
-Pero nun sabíes que la Kahlo y el Trotsky tuvieron saliendo xuntos?
-Quién ye Trotsky?
-El perru la mio vecina, ne.

NUMANCIA 1-2 SPORTING

Pa un plan medio dibuxáu que tenía pa esta selmana, fallóme, nin. Por apaición de ñetu sobrevenida. Poro, dispúnxime, muxín, a falta meyor cosa que facer, a ver el partíu que'l Sporting diba xugar en Soria. Da perceguera lo mal que controlamos el balón, que paez que pesa poco más qu'un globu cuando tropieza coles botes de los nuesos: el Sporting volvió al estáu de Baraxa, como un dentame que, paeciendo iguao pa siempres gracies al aparatu, regresa al estropiciu inicial. Ganemos, eso sí; d'aquella manera: d'esa cola que, pese a la bocona delles vegaes abierta, namora de xemes en cuando l'home del dentame a la muyer, o pelo menos méte-y un 1-2 en casa d'ella.

SPORTING

Munchos tarán entrugándose a ver, hom, esti paisanu a vueltes cola borregada per equí, la oveyada per allá, y toles selmanes fala del Sporting, equipu fútbol, opiu pal pueblu. Pa entamar, pa la Cadarma'l Sporting nun ye fútbol, que nin lu prautica nin mira pa partíu fútbol que nun sía del Sporting. Pa la Cadarma, el Sporting ye una herencia, esta del güelu maternu, como heredó un güeyu vagu o'l calter obsesivu que l'acadarma y encabrona. Asina que nun fai como esos que faen cuando toca lo qu'impón la sociedá d'arriba sinón que fai lo qu'impón el sangre de dientro, esixencia de procedencia bien distinta, como nun ver res pela drecha o atascase con filos absurdos de pensamientu. Eso pudo pasa-y a un madrilanu de la Gran Vía o a un barcelonés de les Rambles: barcelonista, madrilista, nun son borregada, nun tienen gota culpa de nun ver o atascase. Borregada ye la xente xixoneso que se fixo del Madrí o del Barcelona y que pa encima nun mira pal Sporting.

EL PARTÍU NARANXA

Axuntanza d'oveyaes igual a Xixón imposible. Per dientro, berren y enllenen los chigres la oveyada blanco y la oveyada barcelonista; per fuera, percorre les cais la oveyada qu'antroxa. Otra nueche pa casa:

Diz el dichu, esa sabiduría de la fras fecha, que quien muncho abarca poco aperta. Hai partíos políticos (UCD y C's) ensin ideoloxía clara que duren lo que duren y tán pa lo que tán: pa transiciones non traumátiques. C's fue recoyendo votos de los que taben hasta la moña del PPSOE. Taba ehí puestu como la UCD nel so día pero queriendo tar tamién un poco pa la esquierda y eses falcatrúes, yá lo tenemos dicho, tán pa lo que tán y duren lo que duren. La espantada pue ser xeneral: el facha pa Vox, el de la drecha pal PP y el de centru pal PSOE, porque Ciudadanos nun ye nada.

VIVA VOX, PEL MOMENTU

VOX fadió, fodió a la drecha, y eso, pel momentu, ta perbién. Más allá, yá veremos. Por qué VOX fodió, fadió a la drecha? Porque los que tábemos fartos de les patoxaes de la esquierda vamos dir a votala anque seya atapándonos les ñarices, que más güel a sobacón la España que VOX quier pesllar n'interior monocromu. VOX fadió sobre manera a Ciudadanos, que, xurando nun arimase al PSOE, va espantar a los votantes que creyíen que C's yera de centruesquierda, que yeren unos cuantos: más votos pal PSOE coles ñarices atapaes. Vamos mete-y la fueya a Sánchez nel furacu la urna con cara refugu los que yá nun vamos votar a Podemos y nun mos queda otra y los que yá nun van votar a C's gracies a VOX, que va fadiar tamién al PP pel llau estremu de la drechona de coyones, esa que quier tanques en Cataluña y colganos de los güevos a los que creyemos nuna España multicolor incluyíu'l de la llingua asturiana.