USTÉ, VUSTÉ
Ve usté a los neños miralu de frente llantando los sos güeyos nos de vusté y usté cuida que'l noventa y nueve por ciento d'ellos va acabar faciéndolo al revisgu. Por mor de la llei la entropía humana y eso de tanto camentar. Esos neños a los qu'índa-yos cuenten la edá en meses. Allá una vezona foi vusté ún d'ellos y agora albentestate garraría usté la escopeta pa resolver el so desarreglu social. Descá que vusté dexó de tener la boca abierta clisando güeyos ayenos. Pueque la salú mental tea nesi camín que va dende la inocencia del riscar dica'l non fiar nin de so puta ma, dende la mirada direuta a la de revisgu; n'aseñardar en remembrances del tiempu fuxío, amatagao davezu porque usté quier la so salú mental dica la escopeta albentestate masque a vegaes caiga vusté, n'instantes maizonos, en dondo en lluellu, en happy flower power de telefilm pa dempués de xintar y mire usté de frente a los güeyos del so perru.
No hay comentarios:
Publicar un comentario