Xubir y baxar andando pela caleya'l parque, que va pelo alto a la vera les víes. Xubir y baxar cola sola compaña de la lluz, de semeya al atapecer. La xente va per baxo, pelo segao y bien asfaltao. Patinetes llétricos, bicicletes, pasiantes con perru, vieyes en pareya o tríu, xente runner trotiando van per baxo. Tu, perriba, mires p'alantre y vas como si caleyares pel monte Deva, cola sola compaña de la lluz, meyor si ye la del atapecer. Sin embargu'l sábadu, camín del ximnasiu, asitiáu en zona crítica, diz la delegada'l Gobiernu, tuvisti de metete ente la turistada vestío del gorru feliz de la Feria Muestres, los sos pantalones curtios esculeraos y los calcetos blancos paletomadrilanos.
No hay comentarios:
Publicar un comentario