La cadarma que llee

TITIVILLUS DE VÍA ESTRECHA (VERSIÓN QUE-Y VA PRESTAR AL ALBEITE)

Llector de mañanes de El Comercio o La Nueva España (el periódicu qu'haiga disponible), col carburante d'un café con lleche con un sobre de zucre'l celebru cálase en determinaos titulares compuestos pola pluma'l degorriu Titivillus. Súme-y a esto los conteníos propios de la prensa y si con ella nun acaba espertando ye que nun tien usté'l día y más-y val pidir la baxa llaboral. En La Caleya Imaxinaria nun mos ufierten El Mundo, asina que l'únicu AVE de la información que los veceros tenemos al algame ye El País. Pero los veceros separtámonos ente quien escoyemos viaxar al llabor nos cercaníes de vía estrecha y quien opten pol tránsitu infantil del carrusel deportivu: As, Marca (el Sport nun lu agüeya nin Dios). Cuando la cosa n'España se pon gorda, pillo billete d'AVE; y de pasu algo ameyora la gramática, anque tenga qu'espertar pol puru conteníu de lo que davezu pasa nel país.