La cadarma que llee

Ye un colgáu. Si hai daquién susceptible de colgase, esi ye Senén. Pone-y delantre les ñarices a Senén cualesquier sustancia en potencia adictivo ye apostar de xuru a que termina cañicándose nello.

Senén bebe (ta esta nueche convidáu a un Gran Cermeño crianza de 2015, DO Toro), Senén fuma (dende que don Fernando lu punxo a trabayar yá nun mos gorria los pitos), Senén da-y al café puro como p'arreventar trés corazos. Senén escribía ensin parar a la puerta la ilesia San Llorienzu en papeles apañaos pela cai. Agora que gana perres en nómina nun tien tantu tiempu. Nun yera Senén poeta malu. Peritos filólogos tomaron un poema d'él que-y dexara a un amigu pa lligar por un poema escuru de Gamoneda, asina que nun tamos falando del méndigu qu'escribe patoxaes en versu.

-Senén, ¿lleísti a Gamoneda?
-Na mio puta vida, nin.
-Escribiéstilu en castellán, digo yo.
-Supongo.

Tamos falando d'un paisanu que se pasa pel forru los coyones la notoriedá de los enólogos, los baristes, los espertos en tabacu, los escritores y los filólogos con plaza. Pero que ye obsesivu.